کیرالہ: بھارت تامل اور ملیالم فلموں کی مشہور اداکارہ لکشمی مینن کو ایک آئی ٹی پروفیشنل کے اغوا اور تشدد کے مقدمے میں بطور مرکزی ملزمہ نامزد کر لیا گیا۔
بھارتی میڈیا کے مطابق ریاست کیرالہ کے شہر کوچی میں بانر جی روڈ پر واقع ایک بار میں جھگڑا شروع ہوا جہاں اداکارہ کے دوستوں اور متاثرہ آئی ٹی ملازم کے درمیان تلخ کلامی ہوئی۔ بعد ازاں متاثرہ نوجوان جب اپنی گاڑی میں واپس گھر کی جانب جا رہا تھا تو ملزمان نے نارتھ برج کے قریب اس کی گاڑی کو روکا اور اسے ہراساں کیا۔
پولیس کا کہنا ہے کہ متاثرہ کو زبردستی ایک اور گاڑی میں بٹھا کر نامعلوم علاقے میں لے جایا گیا جہاں اس پر مبینہ طور پر تشدد کیا گیا۔
پولیس نے اس معاملے میں اب تک تین افراد کو گرفتار کیا ہے جن میں اداکارہ کا ایک قریبی دوست بھی شامل ہے۔ سوشل میڈیا پر وائرل ویڈیوز میں لکشمی مینن کو بھی دیگر افراد کے ساتھ متاثرہ لڑکے کی گاڑی روک کر اس کے ساتھ بحث و تکرار میں مصروف دیکھا جا سکتا ہے۔
