اسلام آباد: پاکستان اور ترکیہ نے غزہ میں غذائی بحران پر تشویش کا اظہار کرتے ہوئے کثیر جہتی تعاون مزید مضبوط بنانے کے عزم کا اعادہ کیا ہے۔
دفتر خارجہ کے مطابق نائب وزیر اعظم و وزیر خارجہ سینیٹر اسحاق ڈار نے او آئی سی کے اجلاس برائے وزرائے خارجہ کے موقع پر ترک ہم منصب حکان فیدان سے ملاقات کی اور ترکیہ کے قائدانہ کردار پر ستائش کا اظہار کیا۔
ملاقات میں فلسطین کیساتھ مکمل یکجہتی کا اعادہ کیا گیا اور اس بات پر زور دیا گیا کہ فلسطین میں بڑھتے انسانی بحران خصوصا غزہ میں قحط کے پیش نظر فوری انسانی امداد کی اشد ضرورت ہے۔
دونوں رہنماؤں نے پاکستان اور ترکی کے برادرانہ تعلقات کی توثیق کی اور کثیرجہتی تعاون کو مزید مضبوط بنانے کے عزم کا اظہار کیا۔
