اسلام آباد: وزیر خزانہ سینیٹر محمد اورنگزیب نے ملکی بینکنگ نظام کو پیچیدہ قراردیتے ہوئے جدید تقاضوں کے مطابق آسان اور موثر بنانے کی ضرورت پر زور دیا ہے۔
اسلام آباد میں تقریب سے خطاب کرتے ہوئے سینٹر محمد اورنگزیب نے کہا ہے کہ ملکی آبادی کا 10سے 15فیصد طبقہ پہلے ہی ڈیجیٹل کاروبار سے مستفید ہو رہا ہے ،مستقبل میں ڈیجیٹل اثاثوں کی طرف رجحان مزید بڑھے گا۔
انہوں نے کہا کہ تاجروں اور سرمایہ کاروں کو سہولت فراہم کرنا حکومت کی اولین ترجیح ہے، سرمایہ کاری کو آسان بنانے کیلئے حکومت تمام تر کوششیں کر رہی ہے۔انہوں نے کہا ہے کہ معاشی اصلاحات کا عمل جاری ہے، ملکی معیشت بہتری کی جانب بڑھ رہی ہے جسے وقت کے تقاضوں کے مطابق معاشی ترجیحات کو ڈھالنے کی ضرورت ہے۔
انہوں نے کہا کہ ڈیجیٹل سرمایہ کاری سستی، برق رفتار اور شفاف ہے اس لئے اس شعبے میں شفافیت کو یقینی بنانا اور ریگولیشنز کو مزید بہتر بنانا ناگزیر ہے۔
انہوں نے اعتراف کیا کہ دنیا کے دیگر ممالک کی نسبت پاکستان کا بینکنگ نظام پیچیدہ ہے جسے جدید تقاضوں کے مطابق آسان اور موثر بنانے کی ضرورت ہے۔
