راولپنڈی: فیلڈ مارشل چیف سید عاصم منیرنے بلوچستان کے عوام کو درپیش مسائل کے حل کیلئے سول ملٹری تعاون و مشترکہ کوششیں ناگزیر قرار دیتے ہوئے کہا ہے کہ جنوبی بلوچستان کی سماجی و معاشی ترقی کیلئے ہر ممکن تعاون کیا جائے گا۔
آئی ایس پی آر سے جاری بیان کے مطابق فیلڈ مارشل سید عاصم منیر نشانِ امتیاز(ملٹری)، ہلالِ جرات نے صورتحال کے جائزے، ترقیاتی اقدامات کے معائنے اور بلوچستان کے استحکام و خوشحالی کیلئے عسکری و سول اداروں کے درمیان ہم آہنگی کو مزید مضبوط بنانے کے مقصد کے تحت تربت بلوچستان کا دورہ کیا جہاں کور کمانڈر بلوچستان نے ان کا استقبال کیا، اس موقع پر وزیراعلی بلوچستان، چیف سیکرٹری بلوچستان اور دیگر حکام بھی موجود تھے۔
دورے کے موقع پر فیلڈ مارشل عاصم منیر کو سکیورٹی صورتحال، فتنہ الہندوستان کے خلاف کامیاب آپریشنز، جاری ترقیاتی منصوبوں اور جنوبی بلوچستان میں سماجی و معاشی بہتری کی کوششوں پر تفصیلی بریفنگ دی گئی۔وزیراعلی بلوچستان اور سول انتظامیہ کے نمائندوں سے ملاقات میں فیلڈ مارشل عاصم منیر نے گڈ گورننس، بنیادی ڈھانچے کی ترقی اور عوامی مفاد پر مبنی جامع ترقی کی اہمیت پر زور دیا۔
انہوں نے بلوچستان کے عوام کو درپیش چیلنجز سے نمٹنے کیلئے سول اور عسکری اداروں کے باہمی تعاون کو ناگزیر قرار دیا اور جنوبی بلوچستان کی سماجی و معاشی ترقی کے لیے ہر ممکن تعاون کی یقین دہانی کرائی۔
آئی ایس پی آر کے مطابق آرمی چیف نے بلوچستان کے عوام کے ساتھ پاک فوج کے شانہ بشانہ کھڑے ہونے کے عزم کا اعادہ کیا تاکہ خطے میں پائیدار امن، ترقی اور خوشحالی کو یقینی بنایا جا سکے۔ انہوں نے کہا کہ بلوچستان کے عوام کو درپیش مسائل کے حل کیلئے سول و ملٹری تعاون اور مشترکہ کوششیں ناگزیر ہیں۔
ترجمان کے مطابق فوجی جوانوں سے خطاب کرتے ہوئے فیلڈ مارشل عاصم منیر نے ان کے بلند حوصلے، عملی تیاری اور قومی خودمختاری کے تحفظ کیلئے غیر متزلزل عزم کو سراہا اور مشکل حالات میں امن و استحکام قائم رکھنے میں ان کے کردار کی تعریف کی۔
