ٹوکیو: وزیراعلی پنجاب مریم نواز نے 100سال سے کام کرنیوالی عالمی جاپانی کمپنی موریناگا کو پنجاب میں ڈیری کے شعبے میں سرمایہ کاری کی دعوت دیتے ہوئے کہا ہے کہ کمپنی کی شراکت داری سے عوام کو معیاری خوراک کی فراہمی ممکن، ملکی معیشت کو فروغ ملے گا۔
جاری بیان کے مطابق وزیراعلی پنجاب مریم نواز نے جاپان کے دورے کے دوران عالمی شہرت یافتہ جاپانی ڈیری کمپنی موریناگا کے ہیڈکوارٹر اور پلانٹ کا دورہ کیا اور کمپنی کے تحقیق و ترقی شعبے کا معائنہ کیا ، مریم نواز کو کمپنی کی جانب سے تفصیلی بریفنگ دی گئی۔ اس موقع پر دونوں جانب سے جدید جاپانی مشینری و ٹیکنالوجی کے استعمال، صحتمند جانوروں کی افزائش اور اعلی معیار کے گوشت کی پیداوار کیلئے تعاون پر اتفاق کیا گیا۔
وزیراعلی نے کمپنی کو پنجاب میں ڈیری سیکٹر، نوزائیدہ بچوں کی خوراک، بیکری مصنوعات و برآمدی معیار کے گوشت کی مقامی پیداوار جیسے شعبوں میں سرمایہ کاری کی دعوت دیتے ہوئے کہا کہ ہم موریناگا کے ڈیری میں تجربات کو پنجاب کیلئے ماڈل بنانا چاہتے ہیں، پنجاب حکومت ڈیری مصنوعات سے متعلق سرمایہ کاری کے ہر شعبے میں کمپنی کو مکمل سہولیات فراہم کرے گی، ایک ماں ہونے کے ناطے بچوں کی نگہداشت میرے لئے ذاتی طور پر بھی نہایت اہم ہے۔
وزیراعلی نے کہا کہ پاکستان دودھ کی پیداوار کے لحاظ سے دنیا کا چوتھا بڑا ملک ہے جس میں پنجاب کا حصہ 60فیصد ہے، تاہم پنجاب کا ڈیری سیکٹر ابھی بھی 80فیصد پرانے اور غیر سائنسی طریقوں پر انحصار کر رہا ہے جس سے پیداوار اور معیار دونوں متاثر ہو رہے ہیں۔
انہوں نے کہا کہ پنجاب میں زراعت اور لائیو سٹاک سے وابستہ 63فیصد آبادی کو موریناگا کی شراکت داری سے براہ راست فائدہ پہنچے گا، ہم جاپانی کمپنیوں کو خوش آمدید کہتے ہیں اور چاہتے ہیں کہ پنجاب میں ڈیری ڈویلپمنٹ اور ایڈوانس پروٹین نیٹ ورک قائم ہو۔مریم نواز شریف نے یاد دلایا کہ 2017میں وزیراعظم نواز شریف اور اس وقت کے وزیراعلی شہباز شریف کے دور میں بھی موریناگا نے پنجاب میں سرمایہ کاری کی تھی، شیخوپورہ میں کمپنی کی سرمایہ کاری کو پنجاب اور جاپان کے درمیان فلیگ شپ شراکت داری کی مثال قرار دیا گیا۔
وزیراعلی نے موریناگا کے پنجاب میں بزنس ٹرینڈ کو قابل تحسین قرار دیتے ہوئے کہا کہ اس شراکت داری سے نہ صرف معیاری خوراک کی فراہمی ممکن ہو گی بلکہ پاکستان کی معیشت کو بھی فروغ ملے گا۔
