ممبئی: بالی وڈ کے مشہور گانے ‘چٹیاں کلائیاں’ اور ‘بیبی ڈول’ سے مشہور ہونے والی گلوکارہ کنیکا کپور نے میوزک انڈسٹری سے متعلق انکشاف کرتے ہوئے کہا کہ انڈسٹری میں زیادہ تر گلوکاروں کو ان کا معاوضہ نہیں دیا جاتا۔
ایک انٹرویو میں انہوں نے کہا کہ مغربی ممالک کی طرح بھارت میں گلوکاروں کیلئے نہ رائلٹی اور نہ ہی پبلشنگ ہے، جہاں سے پیسے حاصل کیے جاسکیں، اس کے علاوہ گلوکاروں کے لیے کوئی پنشن پلان یا مالی تحفظ نہیں ہے، جب تک آپ کی آواز ہے اور آپ شوز کر سکتے ہیں اور کماسکتے ہیں۔
گلوکارہ نے انکشاف کیا کہ مجھے گانوں کے لیے 101 روپے کی معمولی رقم ادا کی گئی، انڈسٹری گلوکاروں کے ساتھ ایسا سلوک کرتی ہے جیسے گانا دے کر ان پر احسان کیا جا رہا، یہ صرف نئے گلوکاروں تک محدود نہیں ہے، میں نام لیے بغیر بھارت کے مشہور گلوکاروں کے بارے میں بھی بتا سکتی ہوں جنہیں معاوضہ نہیں دیا گیا۔
