اسلام آباد: صدرمملکت آصف زرداری نے شجر کاری مہم کو پاکستان کے محفوظ مستقبل کی ضمانت قرار دیتے ہوئے کہا ہے کہ ہمیں فیصلہ کن انداز میں زیادہ سے زیادہ درخت لگانے کی ضرورت ہے، جنگلات کی کٹائی، درجہ حرارت میں اضافہ اور بار بار آنے والے سیلاب لاکھوں زندگیاں متاثر کر رہے ہیں، قوم کی ترقی جنگلات و قدرتی ماحول کے تحفظ پر منحصر ہے۔
مون سون شجر کاری مہم کے موقع پر جاری بیان میں آصف زرداری نے کہاکہ درخت لگانا ہر شہری کا قومی فریضہ ہے، آج ہم ملک گیر شجر کاری مہم کا آغاز ایسے وقت کر رہے ہیں جب پاکستان کو موسمیاتی تبدیلی کے شدید خطرات لاحق ہیں، رواں سال اگست سے اکتوبر تک پاکستان بھر میں 4کروڑ 10لاکھ سے زائد پودے لگائے جائیں گے۔
انہوں نے کہا کہ درخت ماحول کیلئے زندگی کی علامت ،موسمیاتی تبدیلی کیخلاف سب سے مضبوط ڈھال اور محفوظ مستقبل کی ضمانت ہیں، قوم کی ترقی جنگلات اور قدرتی ماحول کے تحفظ پر منحصر ہے، جنگلات کی کٹائی، درجہ حرارت میں اضافہ اور بار بار آنے والے سیلاب لاکھوں زندگیاں متاثر کر رہے ہیں۔
انہوں نے کہا کہ شہری سرسبز، صاف اور خوشحال پاکستان کیلئے پودے لگائیں، ہر لگایا گیا درخت آفات کے خلاف ڈھال اور آئندہ نسلوں کیلئے زندگی کا ذریعہ ہے۔
انہوں نے کہا کہ حالیہ سیلاب اور بارشوں نے ملک کے مختلف حصوں میں تباہی مچائی، ہمیں گرین پاکستان پروگرام کو کامیاب بنانا چاہئے۔ انہوں نے کہا کہ اہل وطن شجر کاری مہم کے نیک مقصد میں اپنا حصہ ڈالیں، نوجوان تبدیلی کے سفیر بن کر شجر کاری مہم کی قیادت کریں۔
صدر نے کہا کہ کسان درخت لگا کر اپنی فصلوں اور ماحول کی بھی حفاظت کرسکتے ہیں۔ انہوں نے میڈیا، سول سوسائٹی، کمیونٹی رہنمائوں اور علماء پر زور دیا کہ وہ عوام کو قومی فریضے کی حمایت کیلئے متحرک کریں۔
