اسلام آباد: وزیراعظم شہباز شریف نے بغیر معاوضے جناح میڈیکل کمپلیکس ہسپتال کا ڈیزائن تیار کرنے پر چینی کمپنی کا شکریہ ادا کرتے ہوئے کہا ہے کہ ڈیزائن میں ممکنہ وبائی صورتحال سے نمٹنے کیلئے مکمل منصوبہ بندی مثبت و دور اندیش پہلو ہے، میڈیکل کمپلیکس کو اسلام آباد کے دیگر ہسپتالوں سے ڈیجیٹل طور پر منسلک ،ماحول کے تحفظ، پانی کی بچت ،وسائل کے موثر استعمال کو مدنظر رکھا جائے۔
ذرائع کے مطابق وزیر اعظم کی زیر صدارت جناح میڈیکل کمپلیکس اور ریسرچ سینٹر کے منصوبے پر اہم اجلاس کا انعقاد ہوا جس میں وفاقی وزرا احسن اقبال، احد خان چیمہ، شزہ فاطمہ خواجہ، وزیرِ مملکت برائے صحت مختار احمد بھرتھ، کوارڈنیٹر مشرف زیدی، چیئرمین پاکستان کڈنی اینڈ لیور انسٹیٹیوٹ پروفیسر ڈاکٹر سعید اختر، چینی کمپنی کے سی ای او ڈاکٹر لیوژانپئی اور وفد سمیت متعلقہ اعلی حکام نے شرکت کی۔
اجلاس میں چینی کمپنی ہانگ کانگ آوہوا کی جانب سے بغیر معاوضے تیارکردہ ہسپتال کے کنسیپٹ ڈیزائن پر تفصیلی بریفنگ دی گئی۔وزیر اعظم نے اقدام پر چینی کمپنی کی قیادت اورٹیم کا تہہ دل سے شکریہ ادا کرتے ہوئے کہاکہ یہ تحفہ نہ صرف حکومت اور پاکستانی عوام کیلئے اہمیت رکھتا ہے، بلکہ اس ہسپتال سے مستقبل میں شفایاب ہونے والے مریض بھی اسے ہمیشہ یاد رکھیں گے۔
انہوں نے کہاکہ پیش کردہ کنسیپٹ ڈیزائن میں ممکنہ وبائی صورتحال سے نمٹنے کیلئے مکمل منصوبہ بندی شامل ہے جو ایک مثبت اور دور اندیش پہلو ہے۔ وزیراعظم نے شمسی توانائی، قدرتی روشنی کے استعمال، پانی کی ری سائکلنگ اور سرسبز ماحول کے قیام پر بھی اطمینان کا اظہار کیا ۔وزیر اعظم نے اس عزم کا اظہار کیا کہ جناح میڈیکل کمپلیکس کو عالمی معیار کے مطابق ایک ٹرشری کیئر ہسپتال بنایا جائے گا۔
انہوں نے متعلقہ حکام کو ہدایت کی کہ ہسپتال کے پیش کردہ ڈیزائن کا مکمل تکنیکی جائزہ لیا جائے اور منصوبے میں ڈیجیٹلائزیشن اور مصنوعی ذہانت کے استعمال کو بھی یقینی بنایا جائے۔شہباز شریف نے زور دیا کہ منصوبے میں ماحول کے تحفظ، پانی کی بچت اور وسائل کے موثر استعمال کو مدنظر رکھا جائے، وزیر اعظم نے جناح میڈیکل کمپلیکس کو اسلام آباد کے دیگر ہسپتالوں سے ڈیجیٹل طور پر منسلک کرنے کی ہدایت کرتے ہوئے کہا کہ منصوبے کی تعمیر تمام تر مراحل سمیت مقررہ مدت میں مکمل کی جائے۔
واضح رہے کہ چینی کمپنی گزشتہ تین دہائیوں سے زائد عرصے سے دنیا بھر میں ایک ہزار سے زائد ہسپتالوں کے ڈیزائن بنا چکی ہے اور پاکستان کیلئے رضاکارانہ عالمی معیار کے ڈیزائن کی تیاری پاک چین دوستی اور عوامی روابط کی گہرائی کا عکاس ہے۔
