اسلام آباد: وفاقی وزیر اطلاعات عطا اللہ تارڑ نے کہا ہے کہ خیبر پختونخوا میں جاری ریسکیو اور ریلیف آپریشن میں تمام ادارے وسائل بروئے کار لا رہے ہیں، خیبر پختونخوا میں چالیس کے قریب افراد کے لاپتہ ہونے کی اطلاعات ہیں، انسانی جانوں کو محفوظ بنانے کے لئے اقدامات اٹھائے جا رہے ہیں، این ڈی ایم اے کے پیشگی آگاہی نظام سے خیبر پختونخوا سمیت تمام صوبائی حکومتوں کو باقاعدگی سے آگاہی فراہم کی جا رہی ہے۔
اپنے ایک بیان میں عطا اللہ تارڑ نے کہا کہ شہباز شریف سیلابی صورتحال سے مکمل طور پر آگاہ ہیں انہوں نے چیئرمین ایم ڈی ایم اے لیفٹیننٹ جنرل انعام حیدر کو خیبر پختونخوا اور آزاد کشمیر کی حکومتوں سے مسلسل رابطہ رکھنے اور امدادی سرگرمیوں کو تیز کرنے کی ہدایت کی ہے۔
ان کا مزید کہنا تھا کہ این ڈی ایم اے کا کمانڈ اینڈ کنٹرول سینٹر چوبیس گھنٹے فعال ہے اور صورتحال پر کڑی نظر رکھے ہوئے ہے۔
انہوں نے کہا کہ وزیراعظم ہائوس میں ایک خصوصی سیل بھی قائم کیا گیا ہے جو این ڈی ایم اے سے چوبیس گھنٹے رابطے میں ہے، حالیہ بارشوں اور سیلابی صورتحال کے دوران وزیراعظم شہباز شریف تین مرتبہ این ڈی ایم اے کا دورہ کر کے ذاتی طور پر ریسکیو و ریلیف اقدامات کا جائزہ لیا۔
