لاہور: پاکستان شوبز انڈسٹری کی سینئر اداکارہ پروین اکبر نے اولاد کی تربیت کا ذمہ دار والدین کو ٹھہرا تے ہوئے کہا ہے کہ اولاد بری اور اچھی دونوں طرح کی ہوتی ہے، اس میں والدین کی پرورش کا بھی بہت اہم کردار ہوتا ہے، بڑھاپے کا سہارا اولاد ہی ہوتی ہے، اب جو نالائق اولاد ہے اسے آپ کچھ نہیں کہہ سکتے۔
ایک پرو گرام میں گفتگو کرتے ہوئے انہوں نے کہا کہ اسلام نے زندگی میں اولاد کی ایک اہمیت رکھی ہے، اور ہمارے معاشرے میں اگر کسی کی اولاد نہ ہو تو اس کیلئے مشکلات پیدا ہو جاتی ہیں، یہ ایک سسٹم کے تحت ہے۔
انہوں نے مزید کہا کہ میرا بیٹا اس وقت برطانیہ میں موجود ہے اور روزانہ مجھے فون کرکے خیریت معلوم کرتا ہے، پروین اکبر نے مرحومہ اداکارہ عائشہ خان کی اولاد کی مثال دیتے ہوئے کہا کہ عائشہ خان کی اولاد ہے لیکن ان کی موت کیسے ہوئی، ایسی بھی اولاد ہوتی ہے، اس کا ذمہ دار میں ماں باپ کو ٹھہراتی ہوں، والدین کی تربیت کیا تھی؟ والدین نے کیسے پرورش کی جو بچے ان سے دور تھے۔
