کراچی: مقبول ڈراما پرورش کے ہدایتکار میثم نقوی نے کہا ہے کہ ڈراما میں باس کے کردار کو لوگوں نے پسند کیا، اسے بہت محبت ملی، ، اس پر میںحیران بھی ہوں۔
ایک انٹرویو مین انہوں نے کہا کہ ہمارے یہاں ڈراموں میں ایسے کردار ذہنوں پر زیادہ گہرے نقش چھوڑ جاتے ہیں جن کی المناک موت ہوجاتی ہے اور ایسا ہی کچھ باس کے کردار کے ساتھ بھی ہوا۔
پرورش میں باس کے کردار کی موت ہوجاتی ہے جس نے ناظرین کو اداس کردیا، اس بارے میں انہوں نے کہا کہ ڈرامے میں باس کو اکثر سگریٹ پیتے ہوئے دکھایا گیا اور آخر میں بھی اس کی ایش ٹرے میں سگریٹ کے ٹکڑے موجود تھے، اس کے انتقال کے ذریعے یہ پیغام دیا گیا کہ مسلسل سگریٹ نوشی صحت کے لیے مضر ہے۔
ڈرامے میں کم عمر نوجوانوں کے درمیان رومانس دکھانے پر انہوں نے کہا کہ پرورش میں رومانس کی ترویج نہیں کی گئی بلکہ یہ دکھانے کی کوشش کی گئی ہے کہ اس عمر میں بھی نوجوانوں کو پیار ہوتا ہے اور یہ ایک حقیقت ہے جس میں جھوٹ کی آمیزش نہیں کی گئی۔
ہدایتکار نے کہا کہ مسئلہ یہ ہے کہ ناقدین نے مکمل ڈراما نہیں دیکھا، انہوں نے صرف چند وائرل کلپس یا ویڈیوز دیکھ کر ہی یہ سمجھ لیا کہ اس میں یہ سب دکھایا گیا ہوگا، حالانکہ ڈرامے میں ایک بہت اہم پیغام دیا گیا ہے۔
ان کا کہنا تھا کہ ہم نے اس ڈرامے کے ذریعے یہ پیغام دینے کی کوشش کی ہے کہ والدین بچوں کے دوست بن جائیں تاکہ انہیں اپنے بچوں کی ہر سرگرمی کے بارے میں علم ہو اور جب بھی بچے کچھ غلط یا درست کریں تو والدین کو معلوم ہو کہ ان کا بچہ کیا کر رہا ہے۔
