اسلام آباد: نائب وزیر اعظم و وزیر خارجہ اسحاق ڈار نے یوم آزادی پر سٹریٹجک و معاشی مفادات آگے بڑھانے، پرامن ہمسائیگی کو فروغ دینے کے عزم کا اعادہ کرتے ہوئے کہا ہے کہ آزادی کے تحفظ کیلئے سرحدوں کا دفاع، سچائی، انصاف، وقار کے اصولوں کو برقرار رکھنا ضروری ہے، ایک پرچم تلے متحد رہنے تک دنیا کی کوئی طاقت ہمیں شکست نہیں دے سکتی۔
78ویں یومِ آزادی پر جاری بیان میں اسحاق ڈار نے قوم کو جشن آزادی کی مبارکباد دیتے ہوئے کہا کہ ہم سب کے آبا ؤ اجداد کو خراجِ عقیدت جن کی قربانیوں سے پاکستان وجود میں آیا،جب تک ہم لا الہ الااللہ محمد رسول اللہ کے پرچم تلے متحد ہیں کوئی ہمیں شکست نہیں دے سکتا۔
انہوں نے کہا کہ آزادی کے تحفظ کیلئے سرحدوں کا دفاع، سچائی، انصاف، وقار کے اصولوں کو برقرار رکھنا ضروری ہے،ہماری خارجہ پالیسی پاکستان کو ایک ذمہ دار، امن پسند ملک کے طور پر پیش کرتی رہے گی۔
انہوں نے کہا کہ ہماری خارجہ پالیسی شراکت داری مکالمے کے ذریعے تنازعات حل کرنے میں کردار ادا کر رہی ہے، پاکستان باہمی احترام، علاقائی سکون اور امن پر مبنی سفارتکاری کے عزم پر قائم ہے۔
انہوں نے کہا کہ ہر شہری سے اپیل کرتا ہوں کہ متحد رہیں، جمہوری اقدار کی حفاظت کریں، ایک مضبوط، باوقار اور خوشحال پاکستان کی تعمیر میں اپنا کردار ادا کریں۔ انہوں نے کہا کہ مسلح افواج اور عوام کے اس عزم کو سراہتا ہوں جنہوں نے مل کر ہماری خود مختاری کا دفاع کیا، یہ اجتماعی ثابت قدمی ہماری عسکری تیاری کی مظہر اور موثر خارجہ پالیسی کی عکاسی کرتی ہے۔
انہوں نے کہا کہ یومِ آزادی اور معرکہ حق کا یہ دن ہمیں یاد دلاتا ہے کہ آزادی کے تحفظ کیلئے نہ صرف سرحدوں کا دفاع بلکہ سچائی، انصاف اور وقار کے اصولوں کو عالمی تعلقات میں برقرار رکھنا بھی ضروری ہے۔ انہوں نے کہا کہ آج ہم یہ عہد دہراتے ہیں کہ پاکستان کے عالمی وقار کو مزید بلند کریں گے، اپنے سٹریٹجک اور معاشی مفادات آگے بڑھائیں گے اور ایک پرامن ہمسائیگی کو فروغ دیں گے۔
