اسلام آباد: وزیراعظم شہباز شریف نے یوم آزادی پر قوم کو مبارکباد دیتے ہوئے کہا ہے کہ معرکہ حق صرف عسکری فتح نہیں، دو قومی نظریہ کی صداقت کی جیت ہے، آزادی کی ٹھنڈی چھائوں فراہم کرنے والے شہدا کو خراج عقیدت پیش کرتے ہیں، تمام سیاسی جماعتوں اور طبقات کو اتحاد و اتفاق سے قومی مفادات کے تحفظ و فروغ کیلئے اشتراک عمل کی راہ اپنانے کی دعوت دیتا ہوں۔
78 یوم آزادی پر جاری بیان میں وزیراعظم نے کہا کہ آج کے دن اللہ تعالی کے حضور سجدہ شکر ادا کرتے ہوئے قوم کو تہہ دل سے مبارکباد پیش کرتا ہوں۔ انہوں نے کہا کہ بابائے قوم قائداعظم محمد علی جناح اور مفکر پاکستان علامہ محمد اقبال سمیت تحریک آزادی کے بلند ہمت، دور اندیش قائدین اور کارکنوں کو بھی سلام پیش کرتا ہوں جنہوں نے بکھری ہوئی قوم کو ایک فکر، ایک مشن اورایک نصب العین پر نہ صرف متحد کیا بلکہ اپنی ولولہ انگیز سیاسی جدوجہد کے ذریعے تاریخ کا دھارا موڑ کر ایک الگ نظریاتی ریاست کے قیام کے ناممکن سمجھے جانے والے خواب کو شرمندہ تعبیر کر دکھایا۔
وزیراعظم نے کہا کہ گزرے 78 سال آزمائش آمیز سفر، اللہ پر کامل یقین اور تابناک مستقبل کی امید کی کہانی ہے جس میں ہمیں بطور قوم کئی مشکل مراحل سے گزرنا پڑا لیکن اس سب کے باوجود پاکستان نے ہر شعبے میں کامیابیوں اور کامرانیوں کے کئی سنگ میل عبور کئے ہیں، معیشت سے کھیل کے میدانوں اور دفاع سے آئی ٹی تک، ہر شعبے میں، پاکستانیوں نے اپنی بے مثال عزم وہمت اور علم وہنر کے باب رقم کئے ہیں۔
انہوں نے کہا کہ بھارت کی 6 سے 10 مئی 2025ء تک مسلط کردہ جنگ کے دوران معرکہ حق میں پاکستان کی عظیم فتح نے 78 ویں یوم آزادی کی نہ صرف اہمیت میں اضافہ کر دیا ہے بلکہ پاکستانیوں کے دل میں ایک نئی امنگ اور جذبہ بھی بیدار کردیا ہے جس سے جشن آزادی کی خوشیاں دوبالا ہوگئی ہیں۔
وزیراعظم نے کہا کہ اللہ تعالی کے فضل سے بھارت کے اس حملے میں اپنی تابندہ روایات دہراتے ہوئے ہماری بہادر مسلح افواج نے بنیان مرصوص بن کر دشمن کے غرور کا بت پاش پاش کر دیا، ہمارے شیروں اور شاہینوں کی عسکری مہارت، بہادری اور جذبہ ایمانی نے دشمن کو چند گھنٹوں میں ہی گھٹنے ٹیکنے پر مجبور کردیا، آزادی کی ٹھنڈی چھائوں فراہم کرنے والے شہدا کو خراج عقیدت پیش کرتے ہوئے ان کے درجات کی بلندی کی دعا کرتے ہیں۔ انہوں نے کہا کہ یہ صرف عسکری فتح نہیں تھی بلکہ دوقومی نظریے کی صداقت کی بھی جیت تھی جو وطن عزیز کی اساس ہے، ہم اپنے دفاع اور آبی وسائل سمیت قومی مفادات کے تحفظ کے لئے اسی جذبے سے آگے بڑھتے رہیں گے۔
وزیراعظم نے کہا کہ پاکستان کی سالمیت، دفاع اور تحفظ کے عزم کا اعادہ کرتے ہوئے امن پسند قوم کے طورپر یہ بھی دہراتے ہیں کہ ہم خطے اور دنیا میں پرامن بقائے باہمی اور بات چیت کے سفارتی ذرائع سے مسائل کے حل پر یقین رکھتے ہیں، بھارت کو بھی اسی جذبے سے جموں وکشمیر سمیت تمام تنازعات کے حل کی طرف آنا ہوگا۔ انہوں نے کہا کہ حکومت نے عام شہری کی فلاح و بہبود کو ترجیح دی ہے، برسوں کے مسلسل بوجھ کے بعد بجلی کی قیمتوں میں خاطر خواہ کمی کی گئی ہے جس سے عوام اور صنعتوں کو یکساں طور پر ریلیف مل رہا ہے۔
انہوں نے کہا کہ تمام پالیسیوں اور پروگراموں سے قطع نظر پاکستان کے عروج کے پیچھے اصل قوت ہمارا اتحاد ہے، دفاع کی طرح معاشی طورپر ناقابل تسخیر ہونا قومی دفاع اور سالمیت کی ایک بہت بڑی ضرورت ہے جس کیلئے ہم سب کو معرکہ حق اور تحریک پاکستان جیسے پرخلوص جذبے کی ضرورت ہے۔
وزیراعظم نے کہا کہ میں تمام سیاسی جماعتوں اور تمام طبقات کو آج کے دن پرخلوص پیشکش کرنا چاہتا ہوں کہ اتحاد و اتفاق سے قومی مفادات کے تحفظ اور فروغ کے لئے اشتراک عمل کی راہ اپنائیں تاکہ ہم بحیثیت مجموعی قوم کو ترقی و خوشحالی کی اس منزل سے ہم کنار کریں جس کا خواب قیام پاکستان کی صورت ہمارے اسلاف اور شہیدوں نے دیکھا تھا۔
