اسلام آباد: صدر آصف زرداری نے یوم آزادی پر قوم کو مبارکباد دیتے ہوئے کہا ہے کہ معرکہ حق میں کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے، ہم متحد، یکسو ومشترکہ مقصد کیلئے پرعزم ہوں تو ہر شعبے میں کامیابی حاصل کر سکتے ہیں، دنیا نے دیکھ لیا پاکستان امن کا خواہاں مگر اپنی خودمختاری اور علاقائی سالمیت کے تحفظ کی مکمل صلاحیت رکھتا ہے۔
آزادی کی 78ویں سالگرہ پر جاری بیان میں صدر آصف زرداری نے کہا کہ آج ہم قائداعظم محمد علی جناح اور تحریک پاکستان کے تمام کارکنان کو خراج عقیدت پیش کرتے ہیں، یہ دن ہمیں اس جرات، اتحاد اور قربانیوں کی یاد دلاتا ہے جن کی بدولت ہمیں آزادی کی نعمت نصیب ہوئی۔
انہوں نے کہا کہ رواں سال ہم یوم آزادی بڑے افتخار اور ایک تازہ امید کے ساتھ منا رہے ہیں،معرکہ حق میں کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔ انہوں نے کہا کہ حال ہی میں ہماری قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا، معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے۔
صدر مملکت نے کہا کہ معرکہ حق میں کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔ انہوں نے کہا کہ بھارت کی بلاجواز جارحیت کے جواب میں ہم نے تحمل، حکمت اور بھرپور قوت سے اپنے وطن کا دفاع کیا۔ صدر مملکت نے کہا کہ دنیا نے دیکھا کہ پاکستان امن چاہتا ہے، مگر اپنی خودمختاری اور علاقائی سالمیت کے تحفظ کی مکمل صلاحیت رکھتا ہے۔
انہوں نے کہا کہ معرکہ حق میں فتح ہمارے عوام کیلئے نئے اعتماد کا ذریعہ بنی ہے،کامیابی نے قوم کے حوصلے بلند کئے، آپریشن بنیان مرصوص نے اداروں پر اعتماد مزید مضبوط کیا اور پاکستان کے عالمی مقام کو مزید مستحکم کیا۔ صدر مملکت نے کہا کہ آج دنیا پاکستان کو ایک ایسے ملک کے طور پر دیکھتی ہے جو امن کا خواہاں ہے مگر دبائو کے آگے نہیں جھکتا۔ انہوں نے کہا کہ ہم متحد، یکسو اور ایک مشترکہ مقصد کیلئے پرعزم ہوں تو ہم ہر شعبے میں کامیابی حاصل کر سکتے ہیں۔
صدر مملکت نے کہا کہ ہمیں اس جذبے کو معاشی بحالی، تعلیمی اصلاحات، تکنیکی ترقی، ادارہ جاتی اصلاحات اور ماحولیاتی تحفظ کی جانب لگانا ہوگا، انہوں نے کہا کہ نظم، جرات اور حکمت بھارت کے خلاف حالیہ کامیابی کا باعث بنی، نظم اور حکمت ہی ہمیں غربت کے خاتمے، عوام کیلئے مواقع پیدا کرنے اور ایک منصفانہ اور ہمہ گیر معاشرہ قائم کرنے میں بھی کامیابی سے ہمکنار کر سکتی ہے۔
صدر مملکت نے بھارتی زیر قبضہ جموں و کشمیر کے عوام کے ساتھ اظہار یکجہتی کرتے ہوئے کہا کہ کشمیریوں کی جرات، انصاف اور حق خودارادیت کی جدو جہد ہمارے دل کے قریب ہے۔ صدر نے کہا کہ پاکستان کشمیروں کے حق خودارادیت کے حصول تک کشمیریوں کو غیر متزلزل سفارتی، اخلاقی اور سیاسی حمایت فراہم کرتا رہے گا۔
آصف زرداری نے کہا کہ آئیے اس یوم آزادی کو اپنی تاریخ کا ایک نیا باب بنا کر، اختلافات سے بالاتر ہو کر انصاف، مساوات، ایمان اور خدمت خلق پر مبنی ملک کیلئے متحد ہوں۔
