راولپنڈی: سیکیورٹی فورسز نے ژوب کے علاقے سمبازہ میں آپریشن کے دوران فتنہ الہندوستان کے مزید 3خوارج کو ہلاک کر دیا جس کے بعد 4روز میں بھارت کے حمایت یافتہ ہلاک خوارج کی تعداد 50 ہوگئی ہے۔
آئی ایس پی آر سے جاری بیان کے مطابق ژوب کے علاقے سمبازہ میں 7سے 9اگست کے دوران سیکیورٹی فورسز کی کامیاب کارروائیوں میں 47خوارج جہنم واصل ہوئے۔اس کے بعد 10 اور 11 اگست کی درمیانی شب پاکستان افغانستان سرحد کے ساتھ واقع سمبازہ کے نواحی علاقوں میں کلیئرنس آپریشن کیا گیا جس میں مزید 3بھارتی سرپرست یافتہ خوارج کو ہلاک کرکے کے قبضے سے اسلحہ، گولہ بارود اور بارودی مواد برآمد کیا گیا۔
آئی ایس پی آر کے مطابق 4روزہ انسدادِ دہشتگردی آپریشن کے دوران ہلاک خوارج کی مجموعی تعداد 50ہوگئی ہے۔بیان میں کہا گیا ہے کہ سیکیورٹی فورسز وطن کے دفاع، سرحدوں کی حفاظت اور ملک کے امن، استحکام اور ترقی کو نقصان پہنچانے کی ہر کوشش ناکام بنانے کیلئے پرعزم ہیں۔
