لاہور: پاکستانی شوبز انڈسٹری سے وابستہ ماضی کی مشہورِ زمانہ اداکارہ نرما 11 برس کے طویل وقفے کے بعد ایک بار پھر منظر عام پر آگئیں، ان کی سوشل میڈیا پرزیر گردش ویڈیو سوشل میڈیا صارفین کی توجہ کا مرکز بن گئی۔
سوشل میڈیا پلیٹ فارم ٹک ٹاک پر ایک صارف کی جانب سے شیئر کی گئی ویڈیو میں انہیں گلابی ٹی شرٹ اور جم ٹرازر پہنے اپنے جم انسٹرکٹر کے ساتھ پوز دیتے ہوئے دیکھا گیا۔ وائرل ویڈیو کلپ دیکھ کر اندازہ ہوتا ہے کہ ماضی کی اداکارہ ان دنوں اپنا وزن کم کرنے اور اسے متوازن کرنے میں مصروف ہیں۔
ایک اور ویڈیو کلپ میں نرما کو سفید پتلون کے ساتھ سرمئی ٹی شرٹ پہنے دیکھا گیا، اس ویڈیو میں وہ کافی پرجوش نظر آ رہی ہیں۔ دونوں ویڈیوز میں انہیں بغیر میک اپ دیکھا جاسکتا ہے، جس سے اندازہ ہوتا ہے کہ ان کے چہرے میں زیادہ تبدیلی نہیں آئی اور نہ ہی انہوں نے اس عرصے میں کسی قسم کی کاسمیٹک سرجری کروائی ہے۔
یاد رہے اداکارہ نے تمغہ امتیاز یافتہ پاکستانی گلوکار شازیہ منظور کے مشہور گانے بتیاں بجائی رکھ دی وے پر اسٹیج ڈانس پرفارمنس سے خوب شہرت حاصل کی تھی۔ انہیں آخر مرتبہ 2014 میں ریلیز ہونے والی پاکستانی فلم شیر لاہور میں اداکاری کے جوہر دکھاتے ہوئے دیکھا گیا تھا۔
