اسلام آباد: نائب وزیر اعظم ووزیر خارجہ اسحاق ڈار نے اسرائیل کے غزہ پر مکمل فوجی قبضے کے منصوبے کی شدید مذمت کرتے ہوئے کہا ہے کہ یہ بین الاقوامی قانون اور سلامتی کونسل کی قراردادوں کی کھلی خلاف ورزی ہے۔ ان خیالات کا اظہار انہوں نے ترک وزیر خارجہ ہاکان فدان سے ٹیلیفونک رابطے کے دوران کیا۔
ترجمان دفتر خارجہ کے مطابق اسحاق ڈار نے فوری اور بلا تعطل انسانی امداد کی فراہمی، اور اسرائیلی کارروائیوں میں جاری استثنا کے خاتمے پر زور دیا، غزہ کی حالیہ صورتحال پر بھی پاکستان اور ترکیہ مسلسل رابطے میں ہیں اور انسانی بحران کے حل کے لیے عالمی برادری سے فوری اقدامات کا مطالبہ کر رہے ہیں۔
ٹیلی فونک گفتگو میں دونوں وزرائے خارجہ نے غزہ پر اسرائیل کے مکمل فوجی قبضے کے منصوبے کی شدید مذمت کی۔ دفتر خارجہ کے مطابق پاکستانی اور ترک وزرائے خارجہ نے دو طرفہ تعاون اور علاقائی و عالمی امور پر بھی تبادلہ خیال کیا۔
