اسلام آباد: وزیراعظم محمد شہباز شریف نے کہا ہے کہ ڈاکٹر رتھ فاو نے اپنی زندگی کا ہر لمحہ پاکستان کے غریب اور محروم طبقات کی خدمت میں گزارا۔
انہوں نے جزبہ ایثار، بے لوث محبت اور خدمتِ خلق کی ایک ایسی مثال قائم کی جو ہمیشہ یاد رکھی جائے گی۔ پرائم منسٹر آفس کے میڈیا ونگ سے اتوار کو جاری بیان میں وزیر اعظم نے ڈاکٹر رتھ فائو کی برسی کے موقع پر انہیں خراج عقیدت پیش کرتے ہوئے کہا کہ جذام کے مریضوں کے علاج اور انہیں معاشرے میں باعزت مقام دلانے کے لیے ڈاکٹر رتھ فاو کی انتھک کوششیں ہماری قومی تاریخ کا روشن باب ہیں، قوم ان کی خدمات کو ہمیشہ فخر کے ساتھ یاد رکھے گی، ڈاکٹر رتھ فاو کا مشن ہمارے لیے خدمت، ہمدردی اور انسانیت کا پیغام ہے۔
