پشاور: مشیر اطلاعات خیبر پختونخوا حکومت بیرسٹر سیف نے صوبے میں پائیدار امن کیلئے افغانستان سے بات چیت کی ضرورت پر زور دیتے ہوئے کہا ہے کہ افغانستان کو اعتماد میں لئے بغیر ضم شدہ اضلاع سمیت پورے صوبے میں امن کا قیام ممکن نہیں۔
جاری بیان میں بیرسٹر سیف نے کہا کہ خیبرپختونخوا میں پائیدار امن کے قیام کیلئے افغانستان سے بات چیت کا آغاز ناگزیر ہے، مقامی جرگوں کی سفارشات بھی امن کیلئے افغانستان سے مذاکرات کی حمایت کرتی ہیں، افغانستان سے مذاکرات کیلئے صوبائی، وفاقی اور قبائلی عمائدین پر مشتمل مشترکہ جرگے کی تشکیل ضروری ہے۔
انہوں نے کہا کہ افغانستان کو اعتماد میں لئے بغیر ضم شدہ اضلاع سمیت پورے صوبے میں امن کا قیام ممکن نہیں، قیامِ امن میں افغانستان اہم اسٹیک ہولڈر ہے،ضم اضلاع کا افغانستان کیساتھ 2200کلومیٹر سے زائد طویل سرحدی رابطہ ہے۔
انہوں نے کہا کہ وزیراعلی علی امین کی قیادت میں خیبر پختونخوا حکومت قیام امن کیلئے سنجیدہ اقدامات کررہی ہے، مقصد کے تحت وزیراعلی کی سربراہی میں مقامی جرگوں کا سلسلہ جاری ہے جو اگلے ہفتے تک مکمل کر لیا جائے گا، جس کے بعد گرینڈ جرگہ منعقد کیا جائے گا جس میں پائیدار امن کیلئے جامع سفارشات مرتب کی جائیں گی۔
