لاہور: وزیراعلی پنجاب مریم نواز نے کشمیریوں سے اظہار یکجہتی کرتے ہوئے کہاہے کہ کشمیر کی آزادی لوح تقدیر پر ثبت ہو چکی،دنیا پر کھل چکا مسئلہ کشمیر بھارت کا داخلی معاملہ نہیں، انسانی المیہ بن چکا ہے۔
یومِ استحصال کشمیر پر جاری بیان میں مریم نواز نے خودارادیت کی جدوجہد میں کشمیری بہن بھائیوں کی قربانیوں کو خراج عقیدت پیش کرتے ہوئے کہا کہ پانچ اگست 2019ء سے بھارتی مظالم میں اضافے کے باوجود کشمیریوں کا حوصلہ اور ہمت قابل تحسین ہے، کشمیر فیصلہ کرے گا ہم ساتھ کھڑے تھے، ہیں اور رہیں گے۔
انہوں نے کہا کہ بھارتی مقبوضہ کشمیر کا مسئلہ عالمی ضمیر پر سوال ہے، مقبوضہ جموں و کشمیر میں بھارتی مظالم پر عالمی برادری کی بے حسی اور مجرمانہ خاموشی تاریخ کا سیاہ باب ہے، کشمیری بہن بھائیوں پرآزادی کا سورج طلوع جلد ہوگا۔ انہوں نے کہا کہ برصغیر میں مستقل امن کیلئے مسئلہ کشمیر کا حل ناگزیر ہے، بھارت ظلم کر کے کشمیریوں کے حق خودارادیت کو دبانے کی ناکام کوشش کر رہا ہے، ہزاروں کشمیری شہدا کی قربانیاں رائیگاں نہیں جائیں گی۔
انہوں نے کہا کہ کشمیر ہر پاکستانی کے دل میں دھڑک رہا ہے، بھارت کے ظلم و ستم کی وجہ سے کشمیری ایک دہائی سے لاک ڈائون کی زندگی گزار رہے ہیں، کشمیریوں پر انسانیت سوز مظالم پر مستقل بے حسی عالمی ضمیر کے خلاف چارج شیٹ ہے، دنیا کو کشمیر میں ہونے والی انسانی حقوق کی خلاف ورزی پر توجہ دینے کی سخت ضرورت ہے۔
انہوں نے کہا کہ بھارت کا ظلم وقتی ہے لیکشن کشمیر کی آزادی لوح تقدیر پر ثبت ہو چکی ہے۔ انہوں نے کہا کہ دنیا پر کھل چکا ہے کہ مسئلہ کشمیر بھارت کا داخلی معاملہ نہیں بلکہ انسانی المیہ بن چکا ہے، خطے کے ڈیڑھ ارب سے زیادہ لوگ امن اور خوشحالی کی سحر دیکھنے کے مستحق ہیں۔
