راولپنڈی: افواج پاکستان کے سربراہان نے یومِ استحصال کشمیر پر کشمیری عوام سے غیر متزلزل یکجہتی کا اظہار کرتے ہوئے کہا ہے کہ مقبوضہ کشمیر پر غیر قانونی بھارتی قبضہ انسانی المیے کو بڑھا رہا ہے، بھارت کا جابرانہ رویہ، جنگجویانہ بیانیہ اور اشتعال انگیز اقدامات جنوبی ایشیا میں پائیدار امن کے حصول میں بڑی رکاوٹ ہیں، تنازعے کا منصفانہ اور پرامن حل، کشمیری عوام کی خواہشات اور اقوام متحدہ کی قراردادوں کے مطابق خطے میں دیرپا امن کیلئے ناگزیر ہے۔
آئی ایس پی آر کی جانب سے جاری بیان کے مطابق یوم استحصال کشمیر پر فیلڈ مارشل سید عاصم منیر، چیئرمین جوائنٹ چیفس آف سٹاف کمیٹی، نیول چیف، ایئر چیف اور پاکستان کی مسلح افواج نے بھارت کے غیر قانونی زیر قبضہ جموں و کشمیر کے بہادر اور باہمت عوام سے اپنی غیر متزلزل یکجہتی کا اعادہ کیا ہے۔
بیان میں کہا گیا ہے کہ پاکستان کی مسلح افواج کشمیری عوام کے اس جائز اور مسلسل جدوجہد آزادی کی بھرپور حمایت کرتی ہیں جو اقوامِ متحدہ کی سلامتی کونسل کی قراردادوں اور بین الاقوامی قوانین کے تحت ان کا ناقابلِ تنسیخ حق ہے۔
اعلامئے میں کہا گیا ہے کہ بھارت کی جانب سے مقبوضہ کشمیر پر مسلسل غیر قانونی قبضہ، کرفیو نما محاصرہ، منظم انسانی حقوق کی پامالی، اور آبادی کے تناسب میں غیر قانونی تبدیلیاں بین الاقوامی قوانین کی سنگین خلاف ورزیاں ہیں جو خطے میں عدم استحکام اور انسانی المیے کو بڑھا رہی ہیں۔
آئی ایس پی آر نے کہا ہے کہ بھارت کا جابرانہ رویہ، جنگجویانہ بیانیہ اور اشتعال انگیز اقدامات جنوبی ایشیا میں پائیدار امن کے حصول میں بڑی رکاوٹ ہیں، جموں و کشمیر کے تنازعے کا منصفانہ اور پرامن حل، کشمیری عوام کی خواہشات اور اقوام متحدہ کی قراردادوں کے مطابق، خطے میں دیرپا امن کیلئے ناگزیر ہے۔
بیان کے مطابق مسلح افواج نے مقبوضہ کشمیرکے شہدا کو خراجِ عقیدت پیش کرتے ہوئے کشمیری عوام کے شانہ بشانہ کھڑے رہنے کے عزم کا ایک بار پھر اعادہ کرتی ہے۔
