اسلام آباد: پاکستان نے مسجد اقصیٰ کی بے حرمتی کی شدید الفاظ میں مذمت کرتے ہوئے کہا ہے کہ اسرائیلی توسیع پسندانہ پالیسی خطے کو غیر مستحکم کرنے کی سازش ہے،اقوام متحدہ اشتعال انگیز و غیر قانونی اقدامات کے پر اسرائیل کو جوابدہ ٹھہرائے۔
وزارت خارجہ کی جانب سے جاری بیان میں اسرائیلی وزرا اور دیگر کی جانب سے مسجد اقصی کی بے حرمتی اور اشتعال انگیزی کی شدید مذمت کرتے ہوئے کہا گیا ہے کہ سینئر اسرائیلی حکام کا یہ مکروہ اعلان کہ ٹیمپل مائونٹ ہمارا ہے نہ صرف عالمی سطح پر مذہبی جذبات کو مشتعل کرنے کی خطرناک اور دانستہ کوشش ہے ،اس کا مقصد حالات کو بگاڑنا اور مسجد اقصی کی حیثیت کو تبدیل کرنا ہے۔
وزارتِ خارجہ نے خبردار کیا کہ اسرائیل کی توسیع پسندانہ پالیسی سوچے سمجھے منصوبے کے تحت خطے کو غیر مستحکم کرنے اور امن کے کسی بھی ممکنہ راستے کو تباہ کرنے کی کوشش ہے، ان اقدامات سے خطے میں بڑے پیمانے پر تشدد کی ایک خطرناک لہر بھڑکنے کا خدشہ ہے۔
پاکستان نے عالمی برادری خصوصا اقوامِ متحدہ سے مطالبہ کیا ہے کہ وہ اسرائیل کو اس کے غیر قانونی اقدامات پر جوابدہ ٹھہرائیں اور مسجد اقصی کی مذہبی حرمت کے تحفظ کیلئے فوری اور موثر اقدامات کئے جائیں۔
وزارت خارجہ نے فلسطینی عوام کے حق خود ارادیت اور انسانی حقوق کی حمایت کا اعادہ کرتے ہوئے کہا کہ پاکستان جون 1967ء سے قبل کی سرحدوں پر مشتمل خودمختار، آزاد، قابل عمل فلسطینی ریاست کے قیام کی حمایت جاری رکھے گا جس کا دارالحکومت القدس الشریف ہو۔
