اسلام آباد: صدر آصف زرداری نے موجودہ چیلنجز سے نمٹنے کیلئے پولیس صلاحیتوں میں اضافے ،جدید تربیت و اسلحہ فراہمی پر زور دیتے ہوئے کہاہے کہ پیشہ ور اور جدید سازو سامان سے لیس پولیس ہی دشمنانِ ریاست کا موثر مقابلہ کر سکتی ہے،قوم شہدا کی قربانیاں فراموش نہیں کرے گی، حکومت شہدا کے ورثا کی فلاح و بہبود کیلئے اقدامات اٹھاتی رہے گی۔
یوم شہدائے پولیس پرجاری بیان میں صدر زرداری نے کہا کہ آج کے دن ہم اپنے بہادر پولیس افسران اور جوانوں کو خراجِ عقیدت پیش کرتے ہیں جنہوں نے ملک و قوم کے خاطر اپنی جانوں کا نذرانہ پیش کیا۔
انہوں نے کہا کہ پولیس نے دہشت گردی، جرائم اور بدامنی کے خلاف بھرپور جدوجہد کی ہے، شہدا کی قربانیاں عوام کی جان و مال کے تحفظ کیلئے ان کے غیر متزلزل عزم کی علامت ہیں، قوم پولیس کے شہدا کی جرات، وفاداری اور عظیم قربانیوں کو سلام پیش کرتی ہے۔
انہوں نے کہا کہ موجودہ چیلنجز سے نمٹنے کیلئے پولیس کی صلاحیتوں میں اضافہ اور جدید تربیت و اسلحہ کی فراہمی وقت کی ضرورت ہے۔ انہوں نے کہا کہ پیشہ ور اور جدید سازو سامان سے لیس پولیس ہی دشمنانِ ریاست کا موثر مقابلہ کر سکتی ہے۔
انہوں نے کہا کہ ہماری دعا ہے کہ اللہ تعالی شہدا کے درجات بلند فرمائے اور ان کے اہلِ خانہ کو صبر و حوصلہ عطا کرے۔ صدر نے کہا کہ قوم اپنے شہدا کی قربانیوں کو کبھی فراموش نہیں کرے گی، حکومت شہدا کے ورثا کی فلاح و بہبود کیلئے تمام ممکن اقدامات اٹھاتی رہے گی۔
