تہران: ایران نے اسرائیل کے ساتھ 12 دن جاری رہنے والی جنگ کے بعد اپنی فضائی حدود مکمل طور پر کھولنے کا اعلان کر دیا۔ اتوار کو ایران کے شہری ہوا بازی کے ادارے سول ایوی ایشن آرگنائزیشن ( سی اے او) نے اعلامیہ جاری کر دیا۔
جس کے مطابق اب ملکی اور غیر ملکی فلائٹ آپریشن بحال کردیا گیا ہے، مہرآباد کے ہوائی اڈے کو بھی مکمل طور پر پروازوں کے لیے بحال کردیا گیا ہے، اب سے تمام ایئر لائنز اور ٹریول ایجنسیز 24 گھنٹے کھلی ہیں۔ واضح رہے کہ 17 جولائی سے ایران کے تمام ایئرپورٹس کو پروازوں کے لیے کھول دیا گیا تھا تاہم مہر آباد کا ہوائی اڈہ دن کے محدود اوقات کار میں ہی استعمال ہو رہا تھا۔
