راولپنڈی: فیلڈ مارشل سید عاصم منیر نے علاقائی امن کیلئے پاکستان کے پختہ عزم کا اعادہ ،بھارت کی جانب سے دہشتگرد گروہوں کی کھلی سرپرستی کو سختی سے مسترد کرتے ہوئے کہا ہے کہ بھارت معرکہ حق میں شکست کھا چکا ہے،اب فتنہ الخوارج اور فتنہ الہند جیسی پراکسیز کے ذریعے ہائبرڈ وار کا سہارا لے رہا ہے۔
آئی ایس پی آر سے جاری بیان کے مطابق فیلڈ مارشل سید عاصم منیر نے نیشنل ورکشاپ بلوچستان کے 16ویں اجلاس کے شرکاء سے ملاقات کی ۔ورکشاپ میں اراکین پارلیمنٹ، سول سوسائٹی کے نمائندے، سرکاری افسران، دانشور، صحافی اور نوجوانوں سمیت مختلف شعبہ ہائے زندگی سے تعلق رکھنے والے افراد شریک تھے۔
اجلاس سے خطاب کرتے ہوئے فیلڈ مارشل نے کہا کہ بلوچستان کی ترقی، قومی یکجہتی کی ضمانت ہے۔ انہوں نے کہا کہ بھارت معرکہ حق میں شکست کھا چکا ہے ،اب فتنہ الخوارج اور فتنہ الہند جیسی پروکسیز کے ذریعے ہائبرڈ وار کا سہارا لے رہا ہے،یہ تمام فتنہ باز عناصر بھی انشا اللہ اسی انجام سے دوچار ہوں گے جو انہیں معرکہ حق میں ملا تھا۔
فیلڈ مارشل نے کہا کہ پاک فوج دہشتگردی کی لعنت کے مکمل خاتمے تک اپنی جدوجہد جاری رکھے گی۔ انہوں نے بھارت کی جانب سے دہشتگرد گروہوں کی کھلی سرپرستی کو سختی سے مسترد کرتے ہوئے کہا کہ یہ پاکستان کے محب وطن عوام، خاص طور پر بلوچ عوام کی حب الوطنی کو کمزور کرنے کی ایک ناکام کوشش ہے۔
آرمی چیف نے کہا کہ دہشتگردی کا کوئی مذہب، فرقہ یا نسل نہیں ہوتی اس لئے اس کیخلاف پوری قوم کو متحد ہو کر ایک آواز بننا ہوگا۔ فیلڈ مارشل، اجتماعی قومی عزم کے بغیر دہشتگردی جیسے خطرے سے نمٹنا ممکن نہیں۔
فیلڈ مارشل نے بلوچستان میں جاری ترقیاتی منصوبوں کی اہمیت کو اجاگر کرتے ہوئے بین الاقوامی اداروں سے تعاون کو مزید بہتر بنانے اور صوبے کی ترقی کے لیے مشترکہ قومی حکمت عملی اپنانے پر زور دیا اور علاقائی امن کیلئے پاکستان کے پختہ عزم کو بھی دہرایا۔
فیلڈ مارشل نے کہا کہ مادر وطن کو درپیش کسی بھی اندرونی یا بیرونی خطرے کا منہ توڑ جواب دیا جائے گا، قومی وقار اور عوام کے تحفظ کو ہر صورت یقینی بنایا جائے گا۔آئی ایس پی آر کے مطابق نشست کا اختتام آرمی چیف اور شرکا کے درمیان آزادانہ اور بھرپور سوال و جواب کی نشست پر ہوا۔
