اسلام آباد: سیکرٹری جنرل پی ٹی آئی سلمان اکرم راجہ نے کہا ہے کہ 5اگست احتجاج نظام سے بیزاری کا اعلان ہے، ایک طرف پریس کانفرنس پر رہائی، دوسروں طرف سزا دی جاتی ہے، دوہرا معیار ناقابل قبول ہے، سیاسی انتقام کے باوجود اپنی جگہ ڈٹے ہوئے ہیں۔ سپریم کورٹ کے باہر میڈیا سے گفتگو کرتے ہوئے سلمان اکرم راجہ نے کہا کہ 5اگست کا احتجاج عوام کیلئے بانی پی ٹی آئی کی کال ہے، یہ احتجاج اس نظام سے بیزاری کیلئے کیا جارہا ہے۔
انہوںنے کہا کہ آرٹیکل15، 17اور 19کے تحت پرامن احتجاج کرنا شہری کا حق ہے،ہم پاکستان کے ہر گاؤں، چوک اور گلی میں احتجاج کریں گے۔انہوں نے کہا کہ جس طرح الیکشن لوٹا گیا، ممبران کو نااہل کیا گیا، اس کے خلاف احتجاج کیا جائے گا، کیسز میں پھرتی دکھا کر پارٹی رہنماؤں کو نااہل اور جیل میں ڈالا جارہا ہے۔
انہوں نے جھوٹے مقدمات میں لوگوں کو گھروں سے اٹھایا جارہا ہے ہم پھر بھی اپنی جگہ کھڑے ہیں، انہوںنے کہا کہ ایک طرف پریس کانفرنس کرنے پر چھوڑا جاتا ہے تو دوسری طرف سزا دی جاتی ہے، احتجاج سے متعلق تمام فیصلے آئین و قانون کے مطابق ہوں گے،پارٹی ورکر اور تنظیم مل کر اپنی آواز بلند کریں گے۔
