اسلام آباد: ورلڈ بینک نے پاکستان کی میکرو اکنامک بحالی پر اعتماداور اصلاحاتی ایجنڈے کو سراہتے ہوئے طویل المدتی ترقیاتی شراکت داری جاری رکھنے کا عزم کیا ہے جبکہ وزیراعظم شہباز شریف نے سندھ طاس معاہدے پر پاکستان کے موقف کی حمایت پر ورلڈ بینک کا شکریہ ادا کرتے ہوئے کہا ہے کہ پاکستان عالمی قانون کی پاسداری اور علاقائی امن کیلئے پرعزم ہے۔
جاری بیان کے مطابق جمعرات کو وزیراعظم سے عالمی بینک کے مشرق وسطی ، شمالی افریقہ، افغانستان اور پاکستان (میناپ) کے ریجنل نائب صدر عثمان ڈیون نے ملاقات کی جس میں پاکستان اور عالمی بینک کی جانب سے طویل المدتی ترقیاتی اہداف کے حصول ،پاکستانی عوام کے خوشحال مستقبل کی تعمیر کیلئے آئندہ سالوں میں تعاون مزید مضبوط بنانے کے مشترکہ عزم کا اظہار کیا گیا۔
وزیراعظم نے پاکستان کی ترقی کی ترجیحات بالخصوص توانائی، انسانی وسائل، ماحولیاتی تبدیلی اور گورننس شعبوں میں اصلاحات کیلئے سی پی ایف کے سٹریٹجک کردار کو سراہا اور عالمی بینک کے صدر اجے بنگا و سابق کنٹری ڈائریکٹرناجی بن حسائن کا پاکستان کیلئے نئے کنٹری پارٹنرشپ فریم ورک کو آگے بڑھانے میں اہم کردار ادا کرنے پر تہہ دل سے شکریہ ادا کیا۔
وزیراعظم نے سندھ طاس معاہدے جیسے اہم عالمی معاہدے کو نقصان پہنچانے کے یکطرفہ و غیر قانونی بھارتی اقدامات کی روشنی میں پاکستان کے جائز موقف کیلئے عالمی بینک کی اصولی حمایت کو سراہا اور عالمی قانون کی پاسداری، خوشحالی کے حصول و علاقائی امن برقرار رکھنے کیلئے پاکستان کے عزم کا اعادہ کیا۔
وزیراعظم نے تمام مسائل بات چیت کے ذریعے حل کرنے کیلئے پاکستانی عزم کا اظہار کرتے ہوئے 2022ء کے تباہ کن سیلاب کے دوران عالمی بینک کی بروقت اور فراخدلانہ مدد پر شکریہ ادا کیا جس نے پاکستان کو فوری امدادی سرگرمیاں اور تعمیر نو اور بحالی کے اقدامات شروع کرنے میں مدد کی۔
عثمان ڈیون نے پاکستان کے دورے کے دوران پر تپاک مہمان نوازی پر وزیر اعظم کا شکریہ ادا کرتے ہوئے پاکستان کی دیرینہ شراکت داری ،معیشت کے اہم شعبوں میں تعاون کو مزید وسعت دینے کے عالمی بینک کے عزم کا اعادہ کیا۔ انہوں نے پاکستان کی جاری میکرو اکنامک بحالی کو سراہتے ہوئے ملک کو مالیاتی استحکام اور پائیدار ترقی کی طرف لے جانے پر حکومت کی تعریف کی اور موجودہ انتظامیہ کے اصلاحاتی ایجنڈے کو سراہا ۔
انہوں نے وزیراعظم کی مضبوط قیادت کو ادارہ جاتی اصلاحات آگے بڑھانے، سرمایہ کاروں کا اعتماد بحال کرنے اور جامع اقتصادی ترقی کو فروغ دینے کیلئے اہم قرار دیا۔
