راولپنڈی: وفاقی وزیر ریلوے حنیف عباسی نے کہا ہے کہ قوم کو گمراہ کیا جا رہا، عقل سے کام لینا بنیادی اصول ہے، طلباء سنی سنائی باتوں پر یقین نہ کریں، جیسے پاک فوج ملک کو بیرونی خطرات سے بچا رہی ہے ویسے طلبہ و طالبات تعلیم حاصل کر کے ملک کو اندرونی خطرات سے بچائیں۔
فاطمہ جناح ویمن یونیورسٹی راولپنڈی میں منعقدہ تقریب تقسیم انعامات سے خطاب کرتے ہوئے حنیف عباسی نے کہا کہ بورڈ امتحانات میں بچوں نے ٹاپ پوزیشن حاصل کرکے اپنے والدین کا سر فخر سے اونچا کیا۔ انہوں نے کہا کہ بورڈ سسٹم کو بہتر بنانے میں پنجاب حکومت نے مثالی اقدام کئے ہیں ، وزیر اعلی کا سکالر شپ پروگرام طلبہ و طالبات کیلئے بہت اِہم ہے، ایسے اقدامات کسی اور صوبے میں دیکھنے کو نہیں ملتے۔
انہوں نے کہا کہ آج ہماری قوم کو گمراہ کیا جا رہا ہے، کوئی ڈوب رہا ہے تو لوگ مدد کی بجائے بے حس ہوکر ویڈیو بنا رہے ہوتے ہیں، سنی سنائی باتوں پہ عمل نہ کریں، عقل سے کام لینا بنیادی اصول ہے، شعور اور علم کے ساتھ، پاکستان کا نام روشن کرنا ہے۔
انہوں نے کہا کہ ہمارے اساتذہ اور یونیورسٹیز نجی تعلیمی اداروں سے بہت بہتر ہیں جس طرح ریلوے کا محکمہ ڈیجیٹل ہوا اسی طرح اس امتحان کا رزلٹ بھی آن لائن بنا دیا گیا ہے، جو ریفارم تعلیم پر ہوئی اس کا کریڈٹ وزیر اعلی مریم نواز کو جاتا ہے۔
انہوں نے کہا کہ کہ میرے حلقے میں 14کالجز ہیں دو سکولوں کو مزید کالجز بنایا جائے گا،ان سکولوں کو انٹرنیشنل لیول پر لے کر جائینگے۔
