تاشقند: قومی جونیئر ٹیم نے عالمی انڈر 19 والی بال چیمپیئن شپ کے پہلے لیگ میچ میں بیلجیم کو یکطرفہ دلچسپ مقابلے میں 3-0 سے شکست دے دی۔ پول اے میں شامل پاکستان نے بیلجیم کے خلاف اپنے پہلے لیگ میچ میں عمدہ کارکردگی کا مظاہرہ کیا۔ پاکستان نے پہلا سیٹ 25-19 سے جیتا، دوسرے سیٹ میں 25-17 سے کامیابی حاصل کی اور تیسرا سیٹ 25-22سے جیت کر میچ اپنے نام کر لیا۔
دوسرے میچ میں پاکستان کا میزبان ازبکستان سے جمعہ کو مقابلہ ہوگا۔ پاکستان 26 جولائی کو ترکی، 28 جولائی کو پورٹوریکو اور 29 جولائی کو ارجنٹائن سے ٹکرائے گا جبکہ 30 جولائی سے ٹاپ 16 ٹیموں کے درمیان ناک آٹ رانڈ شروع ہوگا، فائنل 3 اگست کو کھیلا جائے گا۔چیمپیئن شپ کے لیے 19رکنی قومی جونیئر اسکواڈ میں 12 کھلاڑی اور 7 آفیشلز شامل ہیں۔
قومی جونیئر ٹیم محمد یحیی، طیب خان، جبران، محمد حسن، محمد ساجد، مجاہد علی شاہ، اجمل جنید، محمد عرفان، جاوید احمد، طلال احمد، ابوبکر صدیق اور خضر حیات پر مشتمل ہے۔ سعید احمد خان ہیڈ کوچ، احسان اقبال اور محمد سلیمان امین اسسٹنٹ کوچ، محمد سلیمان فزیوتھراپسٹ، مظہر فرید ٹیم مینیجر اور محمد شہباز افیشل کی ذمہ داری ادا کر رہے ہیں۔ پاکستان والی بال فیڈریشن کے چیئرمین چوہدری محمد یعقوب قومی جونیئر اسکواڈ کے سربراہ اور چیف ٹیم مشن ہیں۔
عالمی جونیئر چیمپیئن میں شریک 24 ٹیموں میں الجیریا، مصر، ایران، پولینڈ، ارجنٹائن، بیلجیم، کینیڈا، بلغاریہ، چین کولمبیا، کیوبا، فرانس، فن لینڈ، اٹلی، کوریا، جاپان، پاکستان، پولینڈ، اسپین، پورٹریکو، ترکی، تنزانیہ، امریکا اور میزبان ازبکستان شامل ہیں۔24ٹیموں کی چیمپیئن شپ میں امریکا دفاعی چیمپیئن ہے۔ چیمپیئن شپ 3 اگست تک ازبکستان کے دارالحکومت تاشقند میں کھیلی جائے گی۔
