راولپنڈی: ترجمان پاک فوج لیفٹیننٹ جنرل احمد شریف چوہدری نے واضح کیا ہے کہ کشمیر پاکستان کی شہ رگ تھا، ہے اور رہے گا، مٹھی بھر دہشت گرد بلوچستان اور پاکستان کی ترقی و خوشحالی نہیں روک سکتے۔ ذرائع کے مطابق ڈی جی آئی ایس پی آر لیفٹیننٹ جنرل احمد شریف چوہدری نے کنگ ایڈورڈ میڈیکل یونیورسٹی کا دورہ کیا جہاں انتظامیہ اور طلباء نے ان کا پرتپاک استقبال کیا۔
اس موقع پر گفتگو کرتے ہوئے ترجمان پاک فوج نے آپریشن بنیان مرصوص میں پاک افواج کی حکمت عملی پر روشنی ڈالتے ہوئے کہا کہ معرکہ حق میں فتح مبین میں عوام کی حمایت بالخصوص نوجوانوں کا کردار اہم رہا۔
انہوں نے کہا کہ کشمیر پاکستان کی شہ رگ تھا، ہے اور رہے گا۔ترجمان پاک فوج نے کہا کہ بلوچ عوام پاکستان سے تاریخ، مذہب، ثقافت اور روایت کے رشتوں میں جڑی ہے، مٹھی بھر دہشت گرد بلوچستان اور پاکستان کی مجموعی ترقی اور خوشحالی کا راستہ نہیں روک سکتے۔
آپریشن بنیان مرصوص کی تاریخی فتح پر طلباء و طالبات نے افواج پاکستان کو خراج تحسین پیش کرتے ہوئے مزید ایسے انٹرایکٹیو سیشنز کے انعقاد کی خواہش ظاہر کی۔
