اسلام آباد: وزیراعظم شہباز شریف نے برطانیہ کیساتھ دوطرفہ تعاون کی مثبت رفتارپر اطمینان کا اظہارکرتے ہوئے کہاہے کہ پاک برطانیہ حالیہ تجارتی مذاکرات فریقین کیلئے باہمی طور پر فائدہ مند ثابت ہوں گے، برطانیہ میں پی آئی اے پروازوں کی بحالی سے پاکستانی کمیونٹی کی مشکلات دور، لوگوںکے درمیان تبادلے کو بڑھانے میں مدد ملے گی۔
جاری بیان کے مطابق بدھ کو وزیراعظم شہبازشریف سے برطانوی ہائی کمشنر جین میریٹ نے ملاقات کی جس میں پاک برطانیہ تعلقات ،جنوبی ایشیا اور مشرق وسطی کی علاقائی صورتحال پر تبادلہ خیال کیا گیا۔
وزیراعظم نے کنگ چارلس سوئم اور وزیر اعظم کیئر اسٹارمر کیلئے نیک خواہشات کا اظہار کرتے ہوئے کہا کہ رواں سال آخر میں برطانیہ کی قیادت کیساتھ ملاقات کا منتظر ہوں۔ انہوں نے برطانوی حکومت کی جانب سے پی آئی اے کی پروازوں کی بحالی کے فیصلے کا خیرمقدم کرتے ہوئے کہا کہ مثبت پیشرفت سے برطانوی پاکستانی کمیونٹی کو درپیش مشکلات دور کرنے کیساتھ لوگوں کے درمیان تبادلے کو بڑھانے میں مدد ملے گی۔
وزیراعظم نے پاک برطانیہ دوطرفہ تعاون کی مثبت رفتار پر اطمینان کا اظہار کرتے ہوئے کہا کہ دونوں ممالک کے درمیان حال ہی میں ہونیوالے تجارتی مذاکرات دونوں فریقین کیلئے باہمی طور پر فائدہ مند ثابت ہوں گے۔انہوں نے کہا کہ پاکستان اقوام متحدہ کی سلامتی کونسل میں بھی برطانیہ کیساتھ قریبی تعاون کر رہا ہے جس کی صدارت اس وقت پاکستان کے پاس ہے۔
وزیراعظم نے پاک بھارت کشیدگی میں کمی کیلئے برطانیہ کے کردار کو سراہتے ہوئے اس بات کا اعادہ کیا کہ پاکستان بھارت کے ساتھ تمام تصفیہ طلب مسائل پر بامعنی مذاکرات کیلئے تیار ہے۔اس موقع پر برطانوی ہائی کمشنر نے وزیراعظم کو اپنے حالیہ دورہ لندن کے بارے میں بتایا جہاں انہوں نے پاکستان اور برطانیہ کے درمیان تعلقات کو بڑھانے کے حوالے سے وسیع مشاورت کی۔
برطانوی ہائی کمشنر نے وزیر اعظم شہباز شریف کے وژن اور قیادت میں گزشتہ ڈیڑھ سال میں حکومت کی معاشی کارکردگی کو سراہا جس کے نتیجے میں تمام اہم میکرو اکنامک اشاریوں میں نمایاں بہتری آئی
