اسلام آباد: ایشیائی ترقیاتی بینک نے پاکستان میں مہنگائی میں کمی کی پیشگوئی کردی۔ اے ڈی بی کی جانب سے ترقی پذیر ایشیاء اور بحرالکاہل ممالک کی معیشت پر جاری رپورٹ میں رواں سال خطے کی معاشی ترقی کی شرح 4.9سے کم کر کے 4.7فیصد کر دی گئی ہے جبکہ اگلے سال کیلئے خطے کی شرح نمو 4.6فیصد رہے گی۔
رپورٹ کے مطابق امریکی محصولات اور عالمی تجارت میں غیر یقینی صورتحال کے باعث کمی متوقع ہے۔ امریکہ کی جانب سے اضافی ٹیرف عائد کرنے سے ایشیائی ممالک کے متاثر ہونے کا خدشہ ہے جبکہ عالمی تجارت میں غیر یقینی صورتحال کے باعث برآمدات میں کمی آئے گی۔
اے ڈی بی کے مطابق جنوبی ایشیا میں 2026ء میں معاشی ترقی 6.2 اور مہنگائی 4.5 فیصد رہنے کا امکان ہے، جنوب مشرقی ایشیاء کی شرح نمو کم ہوکر 4.2فیصد تک آنے کی توقع ہے جبکہ تیل کی پیداوار میں اضافے سے وسطی ایشیا کی ترقی میں بہتری متوقع ہے جبکہ مہنگائی میں کمی کا رجحان جاری رہے گا۔
رپورٹ کے مطابق چین کی معاشی ترقی کی شرح 4.7فیصد برقرار رہے گی جبکہ بھارت کی معاشی شرح کمی کے بعد نمو 6.5فیصد رہے گی، بھارت کی برآمدات بھی امریکی محصولات سے متاثر ہوں گی جبکہ رئیل اسٹیٹ سیکٹر کی کمزوری چین کی معیشت کیلئے چیلنج ہے۔
اعلامئے کے مطابق افراطِ زر 2025میں 2.0فیصد اور 2026میں 2.1 فیصد رہنے کی توقع ہے۔رپورٹ کے مطابق پاکستان میں رواں سال مہنگائی میں کمی کی پیشگوئی ہے جبکہ معاشی شرح 3فیصد رہنے کا امکان ہے۔
رپورٹ کے مطابق مہنگائی میں کمی کی وجہ خوراک اور دیگر اشیا کی قیمتوں میں کمی ہوگی، رپورٹ کے مطابق پاکستان میں 2025-26ء کے دوران 5.8فیصد مہنگائی کی پیش گوئی برقرار ہے۔ رپورٹ میں اے ڈی بی نے خطے کی معیشتوں کو بنیادیں مضبوط کرنے کی تجویز دی ہے۔
