اسلام آباد: صدر مملکت آصف زرداری نے پاکستان اور آسٹریا کے درمیان تجارت، اقتصادی تعاون بڑھانے کی ضرورت پر زور دیتے ہوئے کہا ہے کہ آسٹریا کے سرمایہ کار پاکستان کے سیاحتی شعبے میں سرمایہ کاری مواقع سے بھرپور فائدہ اٹھا سکتے ہیں ۔
جاری بیان کے مطابق بدھ کو صدر آصف زرداری سے آسٹریا کی سبکدوش سفیر اینڈریا وِکے نے ایوانِ صدر میں الوداعی ملاقات کی اس موقع پر وفاقی وزیر داخلہ محسن نقوی بھی موجود تھے۔
صدرِ مملکت نے دوطرفہ تعلقات کے فروغ میں سفیر اینڈریا وِکے کی خدمات کو سراہتے ہوئے مستقبل کیلئے نیک خواہشات کا اظہار کیا۔ صدر زرداری نے کہا کہ پاکستان آسٹریا کے ساتھ تعلقات کو انتہائی اہمیت دیتا ہے ،دونوں ممالک کے درمیان تجارت اور اقتصادی تعاون کو مزید بڑھانے کی ضرورت ہے۔
انہوں نے کہا کہ آسٹریا کے سرمایہ کار پاکستان کے سیاحتی شعبے میں سرمایہ کاری کے مواقع سے بھرپور فائدہ اٹھا سکتے ہیں جبکہ پاکستان آسٹریا کی الپائن ٹورازم میں مہارت سے بھی مستفید ہو سکتا ہے۔ صدر مملکت نے کہا کہ آسٹریا کی کمپنیاں پاکستان کے تربیت یافتہ آئی ٹی ماہرین کی خدمات سے بھی فائدہ اٹھا سکتی ہیں۔
