اسلام آباد: رہنماء پی ٹی آئی سلمان اکرم راجہ نے کہا ہے کہ شاہ محمود قریشی کی پارٹی قیادت سنبھالنے کی بات قبل از وقت ہے، نظام انصاف اب انصاف کا نظام نہیں رہا، منصوبہ ساز ملک، عدلیہ اور نظام کیساتھ جو کررہے ہیں وہ سامنے ہے۔
اسلام آباد ہائیکورٹ میں میڈیا سے گفتگو کرتے ہوئے سلمان اکرم راجہ نے کہا کہ ہم سب فسطائیت کا شکار ہیں، اس میں کسی کیلئے کوئی استثنیٰ نہیں، کسی قسم کا کوئی غلط مفروضہ قائم نہ کیا جائے۔
انہوں نے کہا کہ منصوبہ ساز ملک ،عدلیہ اور نظام کیساتھ جو کررہے ہیں وہ ہمارے سامنے ہے ،یہ ایسی صورتحال ہے جس کو قبول نہیں کرنا چاہئے، یہ پی ٹی آئی کا نہیں پوری کا قوم کا مسئلہ ہے، پوری قوم کو بتایا جارہا ہے کہ نظام انصاف اب انصاف کا نظام نہیں رہا۔
انہوں نے کہا کہ زندہ قومیں ایسی صورتحال کا جواب دیا کرتی ہیں، خاموش نہیں رہتی ،دیکھتے ہیں پاکستانی قوم کیا جواب دیتی ہے۔ایک سوال پر انہوں شاہ محمود قریشی کیخلاف ابھی بھی 5،6مقدمات ہیں، یہ کہنا قابل ازوقت ہے کہ وہ پارٹی کی قیادت سنبھالیں گے، وہ ابھی باہر نہیں آرہے انہوں نے کہا کہ ہم لڑتے رہیں اور عدلیہ کی آزادی کی بات کرتے رہیں گے۔
