اسلام آباد: وزیراعظم شہباز شریف نے کہا کہ اہداف کا حصول بہترین تربیت، سہولیات کی فراہمی سے ہی ممکن ہے، میدانِ عمل میں عام آدمی کو انصاف کی فراہمی پولیس کی اولین ترجیح ہونی چاہئے، دہشت گردی کے خاتمے کیلئے افواج پاکستان، رینجرز، ایف سی، پولیس و دیگر سیکیورٹی ادارے دن رات مصروف عمل ہیں، فرض کی ادائیگی کیلئے جانوں کا نذرانہ پیش کررہے ہیں۔
منگل کو نیشنل پولیس اکیڈمی میں52ویں کامن بیچ کی پاسنگ آئوٹ پریڈ ہوئی جس میں 9خواتین سمیت 43 افسران نے تربیت مکمل کی۔ تقریب میں وزیراعظم شہباز شریف، وفاقی وزیر اطلاعات عطا اللہ تارڑ، وزیر داخلہ محسن نقوی، وزیر مملکت داخلہ طلال چودھری اور سینئر افسران نے شرکت کی۔
وزیراعظم نے پولیس اصلاحات، تربیت، سہولیات فراہمی، ماسٹر ڈگری کے اجراء بارے اعلانات کئے اور فائرنگ رینج و ہاسٹل کی تعمیرکے منصوبوں کا سنگ بنیادبھی رکھا۔ وزیراعظم نے بہترین کارکردگی دکھانے والے افسران میں لیپ ٹاپ بھی تقسیم کئے۔
تقریب سے خطاب کرتے ہوئے وزیراعظم نے کہا کہ پاس آئوٹ ہونیوالے افسران واہلکاروں نے تربیت کے بعد میدان عمل میں عام آدمی کو انصاف دینا ،عوام کی جان و مال کا تحفظ یقینی بنانا ہے۔ انہوں نے کہا کہ افسران نے شہروں اور دیہات میں امن قائم کرنا ہے، اہداف کا حصول تبھی ممکن ہے جب بہترین تربیت اور سہولتوں کویقینی بنایا جائے۔
انہوں نے کہا کہ ملک میں دوبارہ دہشتگردی نے سر اٹھایا ہے، جس کے قلع قمع کیلئے ہماری بہادرافواج سرگرم ہیں، رینجرز، ایف سی، پولیس اور دیگر سکیورٹی ادارے بھی روز دہشتگردوں کا مقابلہ کررہے ہیں۔ انہوں نے کہا کہ عوام کے جان ومال کی حفاظت اورانصاف کی فراہمی افسران کی ترجیح ہونی چاہئے، آج نیشنل پولیس اکیڈمی میں آکر بہت خوشی ہوئی۔
انہوں نے کہا کہ بطور وزیراعلی پنجاب ایلیٹ فورس کا قیام عمل میں لایا جس کا مقصد ایلیٹ کا تحفظ نہیں بلکہ معاشرتی برائیوں کوختم کرنا تھا۔ انہوں نے کہا کہ انسداد دہشت گردی ڈیپارٹمنٹ کا قیام عمل میں لائے اور لاہور میں فرانزک لیب قائم کی، پنجاب پولیس میں 100فیصد میرٹ پر بھرتیاں کیں جس کے بعد سب اداروں نے مل کردہشت گردی کے خاتمے میں کردار ادا کیا۔
وزیراعظم نے پولیس اہلکاروں کی قربانیوں کو خراج تحسین پیش کرتے ہوئے کہا کہ دریائے جہلم میں ایک پولیس جوان نے شہریوں کی جان بچاتے ہوئے شہادت پائی، وطن کی آبیاری اور فرض کی ادائیگی کیلئے پولیس کے جوان اپنی جانوں کا نذرانہ دے رہے ہیں۔
