پیرس: ناروے کے سائیکل سوار جوناس ابراہامسن نے ٹور ڈی فرانس سائیکل ریس کا گیارہواں مرحلہ جیت لیا۔ گیارہویں مرحلے میں سائیکل سواروں نے فرانس میں ٹولوس تک کا فاصلہ طے کرنا تھا جو سیدھے رستے پر 156.8کلو میٹر پر محیط تھا۔
29سالہ ناروے کے سائیکل سوار جوناس ابراہامسن نے عمدہ سائیکلنگ کا مظاہرہ کرتے ہوئے 156.8 کلومیٹر کا فاصلہ 3 گھنٹے 15منٹ اور 56 سیکنڈز میں طے کرکے پہلی پوزیشن حاصل کی۔25 سالہ میزبان سوئس سائیکل سوار مورو شمڈ نے گیارہویں راؤنڈ میں دوسری پوزیشن حاصل کی جبکہ 30سالہ بیلجیم کے سائیکل سوار میتھیو وین ڈیر پوئل نے تیسری پوزیشن حاصل کی۔
دسویں مرحلے میں تیسری پوزیشن ہولڈر 24سالہ آئرش سائیکل سوار بین ہیلی نے یلوجرسی حاصل کر لی تھی جس پر تاحال ان کا قبضہ برقرار ہے۔ٹور ڈی فرانس سائیکل ریس 24 روز جاری رہنے کے بعد 27 جولائی کو اختتام پذیر ہوگی۔
