روم: ٹی ٹوئنٹی ورلڈ کپ 2026 میں کوالیفائی کرنے والی ٹیم اٹلی کے اوپننگ بیٹر زین نقوی نے کہا ہے کہ ذاتی خواہش ہے کہ بھارت اور پاکستان کے ساتھ ٹی ٹوئنٹی ورلڈکپ میں کھیلنے کا موقع ملے، ٹی ٹوئنٹی ورلڈ کپ 2026 بھارت میں ہے، ممبئی میں کھیلنے کی خواہش ہے، مستقبل میں پی ایس ایل اور آئی پی ایل کھیلنا چاہتا ہوں۔
ایک انٹرویو میں انہوں نے کہاکہ آئی سی سی کی طرف سے کم میچز ملتے ہیں، ٹی ٹوئنٹی ورلڈکپ میں کوالیفائی کرنے کے بعد امید ہے زیادہ میچز ملیں گے، میں جارحانہ انداز میں بیٹنگ کرتا ہوں، انگلینڈ کے سابق کپتان جوس بٹلر پسند ہیں۔
زین نقوی نے بتایا کہ بارہ تیرہ سال کا تھا جب فیملی کے ساتھ اٹلی شفٹ ہوا، ٹیپ بال کرکٹ اچھی کھیلتا تھا، بعد میں ہارڈ بال کرکٹ کھیلنا شروع کی، 2 سال اٹلی کی ڈومیسٹک کرکٹ میں اچھی پرفارمنس دکھائی اور اٹلی کی قومی کرکٹ ٹیم میں 2021 میں منتخب ہوا، اٹلی آیا تو تعلیم پر فوکس تھا لیکن کرکٹ ہمیشہ سے پسندیدہ کھیل تھا۔
انہوں نے کہا کہ اٹلی میں کرکٹ گراونڈز کی کمی ہے، صرف چند کلبز کے پاس گراونڈز ہیں، ٹی ٹوئنٹی ورلڈ کپ میں کوالیفائی کرنے کے بعد امید ہے آئی سی سی اٹلی میں گراونڈز بنانے میں مدد کرے گا۔
ان کا کہنا ہے کہ 2023 ورلڈ کپ میں آئرلینڈ سے شکست کھا لی تھی، ورنہ اٹلی ورلڈ کپ میں کوالیفائی کر لیتی، 2023 میں ہمیں معلوم ہو گیا تھا کہ ہم ورلڈ کپ میں کوالیفائی کر سکتے ہیں۔
