مظفرآباد/سرینگر: پاکستان سمیت دنیا بھر میںمقبوضہ کشمیر کی آزادی کی خاطر جانوں کا نذرانہ دینے والے 22 کشمیری شہدا کو خراج عقیدت پیش کرنے کیلئے یوم شہدائے کشمیر منایا گیا، حریت کانفرنس کی کال پر مقبوضہ وادی میں ہڑتال کی گئی ہے۔
اس دن کی مناسبت سے دنیا بھر میں مقیم کشمیریوں نے ریلیاں، جلسے، جلوس اور تقریبات کا انعقاد کیا جن میں تحریکِ آزادی کشمیر کے ان بائیس عظیم شہدا کو خراج عقیدت پیش کیا گیا۔
یاد رہے 13 جولائی 1931 تحریک آزادی کشمیر کا وہ تاریخی سنگِ میل ہے جب عبدالقدیر نامی کشمیری کے مقدمے کی سماعت جیل میں جاری تھی، جیل کے باہر ہزاروں کشمیری جمع تھے، وقتِ ظہر آیا، ایک نوجوان نے اذان شروع کی، جسے ڈوگرہ فوج نے گولی مار دی، پھر دوسرا، تیسرا، چوتھا اسی طرح یکے بعد دیگرے 22 جوان شہید کر دیئے گئے، مگر اذان مکمل ہوئی اور تاریخ گواہ بن گئی کہ یہ قربانی کشمیر کی آزادی کی بنیاد ہے۔
کشمیری عوام ہر سال اس دن کو یومِ شہدا کشمیر کے طور پر مناتے ہیں، سات دہائیوں سے زائد عرصہ سے وہ بھارت کے غاصبانہ قبضے کے خلاف جدوجہد میں مصروف ہیں، اور قربانیوں کی لازوال داستان رقم کر رہے ہیں۔
