اسلام آباد: ملک میں ہفتہ وار مہنگائی کی شرح میں 0.95فیصد اضافہ ہوگیا ، ایک ہفتے میں 19اشیاء مہنگی، 6 سستی، 26 کی قیمتوں میں استحکام رہا۔ وفاقی ادارہ شماریات کی جانب سے جاری ہفتہ وار مہنگائی رپورٹ کے مطابق حالیہ ہفتے کے دوران ملک میں مہنگائی کی شرح میں 0.95فیصد اضافہ ہوا جبکہ سالانہ بنیاد پر مہنگائی میں اضافے کی رفتار کی شرح 1.23فیصد رہی ہے ۔رپورٹ کے مطابق رواں ہفتے 19اشیاء مہنگی، 6 سستی، 26 کی قیمتوں میں استحکام رہا۔
حالیہ ایک ہفتے کے دوران آلو کی قیمتوں میں2.79فیصد،پیاز کی قیمتوں میں6.25فیصد، ٹماٹرکی قیمتوں میں13.45فیصد،لہسن کی قیمتوں میں2.36فیصد، گڑکی قیمتوں میں1.89فیصد، چینی کی قیمتوں میں1.90فیصد،باسمتی ٹوٹا چاول کی قیمتوں میں0.84فیصد اور چکن کی قیمتوں میں22.61فیصد اضافہ ہوا ہے۔
اس کے علاوہ ایل پی جی کی قیمتوں میں2.56فیصد،سرسوں کے تیل کی قیمتوں میں0.81فیصد،دال مونگ کی قیمتوں میں0.41فیصد، کوکنگ آئل کی قیمتوں میں0.20فیصد، وناسپتی گھی کی قیمتوں میں0.02فیصد اور آٹے کی قیمتوں میں0.02فیصد کمی ہوئی ہے۔
اعدادوشمار کے مطابق حالیہ ہفتے میں حساس قیمتوں کے اعشاریہ کے لحاظ سے سالانہ بنیادوں پر 17ہزار 732روپے ماہانہ تک آمدنی رکھنے والے طبقے کیلئے مہنگائی میں اضافے کی رفتار1.06فیصد اضافے کیساتھ منفی1.83فیصد، 17ہزار 733روپے سے 22ہزار 888روپے ماہانہ تک آمدنی رکھنے والے طبقے کے لئے مہنگائی میں اضافے کی رفتار 1.10فیصد اضافے کے ساتھ منفی 2.79فیصد رہی۔
رپورٹ کے مطابق 22ہزار 889روپے سے 29ہزار 517روپے ماہانہ تک آمدنی رکھنے والے طبقے کیلئے مہنگائی میں اضافے کی رفتار0.99فیصداضافے کیساتھ منفی1.41فیصد، 29ہزار 518روپے سے 44ہزار 175 روپے ماہانہ تک آمدنی رکھنے والے طبقے کیلئے مہنگائی میں اضافے کی رفتار1.02فیصداضافے کے ساتھ منفی 0.59فیصد رہی جبکہ44ہزار 176روپے ماہانہ سے زائد آمدنی رکھنے والے طبقے کیلئے مہنگائی میں اضافے کی رفتار0.88فیصداضافے کیساتھ منفی 0.04فیصدرہی ہے۔
