اسلام آباد: وزیراعظم شہباز شریف نے کہا ہے کہ آبادی کے استحکام کیلئے مربوط، کثیر شعبہ جاتی نقطہ نظر کی ضرورت ہے، اچھی پرورش،با اختیار بنانے سے نوجوان نسل جدت، پیداواری صلاحیت اور قومی ترقی کیلئے متحرک قوت بن سکتی ہے۔
آبادی کے عالمی دن پر جاری بیان میں وزیراعظم نے کہا کہ ہر سال آبادی کا عالمی دن اس عزم کیساتھ منایا جاتا ہے کہ آبادی میں پائیدار اضافے اور جامع ترقی کو فروغ دینے کیلئے پوری دنیا متحد ہے ۔انہوں نے کہا کہ رواں سال عالمی یوم آبادی کا عنوان ‘نوجوانوں کو بااختیار بنانا کہ وہ ایک منصفانہ اور پرامید دنیا میں اپنے مطلوبہ خاندانوں کو تشکیل دے سکیں’پاکستان کے آبادیاتی منظرنامے کیلئے ایک اہم پیغام رکھتا ہے۔
انہوں نے کہا کہ 24 کروڑ سے زائد آباد ی میں تقریبا 65فیصد کی عمریں 30سال سے کم ہیں،نوجوانوں کی یہ بڑی تعداد ایک غیر معمولی موقع اور ایک اہم چیلنج کی نمائندگی کرتی ہے اگر نئی نسل کی اچھی پرورش پر توجہ مرکوز کی جائے اور انہیں بااختیار بنایا جائے تو ہماری نوجوان آبادی جدت، پیداواری صلاحیت اور قومی ترقی کے لئے ایک متحرک قوت بن سکتی ہے تاہم اتنی بڑی اور بڑھتی ہوئی آبادی کا انتظام عوامی وسائل اور حکمرانی کے نظام پر بھی زبردست دبائو ہے۔
انہوں نے کہا کہ حکومت جامع، حقوق پر مبنی آبادی کے ایجنڈے کیلئے پوری طرح پرعزم ہے، ہم صحت کی دیکھ بھال تک مساوی رسائی یقینی بنانے، خاندانی منصوبہ بندی کو فروغ دینے اور ایسے نظام کو مضبوط بنانے پر توجہ مرکوز کئے ہوئے ہیں جو افراد کو وقار اور خود مختاری کیساتھ اپنے مستقبل کے بارے میں انتخاب کرنے کی اجازت دیتے ہیں، یہ کوششیں پائیدار ترقی کے اہداف اور ایف پی اہداف کے تحت پاکستان کے وعدوں کے ساتھ مکمل طور پر ہم آہنگ ہیں۔
انہوں نے کہا کہ آبادی کے استحکام کیلئے ایک مربوط، کثیر شعبہ جاتی نقطہ نظر کی ضرورت ہے۔وزیر اعظم نے تمام سٹیک ہولڈرز، وفاقی و صوبائی حکومتوں، ترقیاتی شراکت داروں، سول سوسائٹی، پرائیویٹ سیکٹر، مذہبی رہنمائوں اور مقامی کمیونٹیز پر زور دیا کہ وہ ان چیلنجز سے نمٹنے کیلئے اپنی مشترکہ ذمہ داری کا اعادہ کریں تاکہ آبادی کے چیلنجز سے نمٹنے کے عزم کو یقینی بنایا جا سکے اور پاکستان کامستقبل صحتمند اور زیادہ خوشحال بن سکے۔
