اسلام آباد: وزیراعظم شہباز شریف نے نیشنل ٹیرف کمیشن کی ہنگامی بنیادوں پر تنظیم نو کی ہدایت کرتے ہوئے کہا ہے کہ نیشنل ٹیرف کمیشن کی خودکار ،موثر تحقیقی استعداد ملکی کاروبار کو درپیش مسائل حل کرنے میں کلیدی کردار ادا کر سکتی ہے۔
جاری بیان کے مطابق وزیراعظم شہباز شریف کی زیر صدارت نیشنل ٹیرف کمیشن کی کارکردگی پر جائزہ اجلاس ہوا جس میں وفاقی وزیر موسمیاتی تبدیلی ڈاکٹر مصدق ملک، وفاقی وزیر خزانہ محمد اورنگزیب، وفاقی وزیرِ اقتصادی امور احد خان چیمہ، وفاقی وزیر برائے پیٹرولیم علی پرویز ملک اور متعلقہ اعلی سرکاری عہدے داران نے شرکت کی۔
وزیراعظم نے نیشنل ٹیرف کمیشن کی قانونی، انتظامی و دیگر اداراجاتی اختیارات و فرائض کی ہنگامی بنیادوں پر تنظیم نو کی ہدایت کرتے ہوئے کہا کہ نیشنل ٹیرف کمیشن کے پاس ملکی کاروبار، درآمدات و برآمدات مارکیٹ کے متعلق تمام زمینی حقائق اکٹھے کرنے کی موثراستعداد ہونی چاہئے، نیشنل ٹیرف کمیشن کی خودکار اور موثر تحقیقی استعداد ملکی کاروبار کو درپیش مسائل حل کرنے میں کلیدی کردار ادا کر سکتی ہے۔
انہوں نے کہا کہ حکومت، نیشنل ٹیرف کمیشن کی تربیت و وسائل کی کمی اور اس کے کام کو جدید تقاضوں سے ہم آہنگ کرنے کیلئے پرعزم ہے۔
وزیراعظم نے ہدایت دی کہ نیشنل ٹیرف کمیشن کو مزید فعال بنانے کیلئے حالیہ کارکردگی کی تھرڈ پارٹی نظر ثانی کی جائے ۔وزیر اعظم نے نیشنل ٹیرف کمیشن کے اپیلیٹ ٹریبونل کو فوری فعال کرنے کی ہدایت کرتے ہوئے جاری نئی ہدایات پر پیشرفت کی بریفنگ اگلے ماہ دینے کا حکم دیا ۔
