اسلام آباد: میٹا نے پاکستان میں اردو زبان میں اے آئی ماڈلز اور ڈیجیٹل تربیت میں تعاون کی پیشکش کردی جبکہ وفاقی وزیر آئی ٹی شزا فاطمہ نے کہا ہے کہ مصنوعی ذہانت کا موثر استعمال پاکستان کے مستقبل میں ترقی کا ضامن ہے،حکومت نوجوانوں کی صلاحیتوں میں اضافے اور عوامی خدمات کی بہتری کا سبب بننے والے اقدامات کا خیر مقدم کرتی ہے۔
جاری بیان کے مطابق وفاقی وزیر شزا فاطمہ خواجہ سے عالمی ٹیکنالوجی کمپنی میٹا کے اعلی سطح وفد نے صار م عزیز کی سربراہی میں ملاقات کی جس میں پاکستان میں ڈیجیٹل ترقی، مصنوعی ذہانت اور نوجوانوں کی ڈیجیٹل تربیت سے متعلق امور پر تبادلہ خیال کیا گیا۔
وفد نے وفاقی وزیر کو اپنے جدید ایل لاما ماڈلز اور جینیریٹیو اے آئی پر بریفنگ دیتے ہوئے پاکستان میں ڈیجیٹل تربیت و اے آئی تعاون بڑھانے میں دلچسپی کا اظہار کیا۔صارم عزیر نے کہا کہ میٹا پاکستان میں نہ صرف تکنیکی تربیت بلکہ اے آئی میں مقامی سطح پر استعداد کار بڑھانے کیلئے حکومت کے ساتھ تعاون کا خواہاں ہے۔
شزا فاطمہ نے کہا کہ ڈیجیٹل پاکستان کی تشکیل وزیراعظم کا وژن ہے اور وہ ہر ہفتے کیش لیس معیشت سے متعلق اجلاس کی خود صدارت کرتے ہیں۔انہوں نے واضح کیا کہ ڈیجیٹل ٹیکنالوجی کے ذریعے عوامی خدمات میں بہتری لائی جا رہی ہے اور حکومت نوجوانوں کو ڈیجیٹل مہارتوں سے آراستہ کرنے کو اپنی اولین ترجیح سمجھتی ہے۔
انہوں نے کہا کہ مصنوعی ذہانت کا موثر استعمال پاکستان کے مستقبل میں ترقی کا ضامن ہے ،اردو زبان میں اے آئی ماڈلز کی تیاری ایک خوش آئند اور اہم قدم ہے۔
شزا فاطمہ نے کہا کہ ڈیجیٹل ترقی میں پبلک اور پرائیویٹ شراکت داری کلیدی حیثیت رکھتی ہے ،حکومت ایسے تمام اقدامات کا خیرمقدم کرتی ہے جو نوجوانوں کی صلاحیتوں میں اضافے اور عوامی خدمات کی بہتری کا سبب بنیں۔
