اسلام آباد: وزیر اطلاعات عطاء تارڑ نے کہا ہے کہ سپورٹس جرنلسٹ نے کھیلوں کے فروغ میں کلیدی کردار ادا کیا، حوصلہ افزائی ترجیحات میں شامل ہے، قومی ٹیلنٹ دنیا تک پہنچانے والے مخلص، محنتی صحافی ہی ملک کے اصل سفیرہیں۔
منگل کو راولپنڈی اسلام آباد جرنلسٹس ایسوسی ایشن کے زیر اہتمام ورلڈ سپورٹس جرنلسٹس ڈے کے حوالے سے منعقدہ تقریب سے خطاب کرتے ہوئے عطاء تارڑ نے کہا کہ آج سپورٹس جرنلسٹس کے حوالے سے اہم دن ہے، کھیلوں کی سرگرمیوں کو اجاگر ، انہیں آگے بڑھانے اور صحتمند مقابلے کے رجحان کے فروغ میں سپورٹس جرنلزم نے کلیدی کردار ادا کیا ہے۔
انہوں نے کہا کہ سپورٹس جرنلسٹس نے گراس روٹ لیول سے لے کر عالمی سطح تک کے مقابلوں میں کھیلوں کو نمایاں کیا ۔ وزیر اطلاعات نے کہا کہ پاکستان کی کھیلوں کی تاریخ میں جتنا بھی نام اور وقار پیدا ہوا اس کے پیچھے سپورٹس جرنلسٹس کی انتھک محنت کار فرما ہے۔
انہوں نے کہا کہ کہ سپورٹس جرنلزم نے نہ صرف پاکستان بلکہ دنیا بھر میں نوجوان کھلاڑیوں کے ئے امید، حوصلہ اور عزم کا پیغام دیا ہے۔ انہوں نے کہا کہ سپورٹس مین سپرٹاور ‘سپرٹ آف دی گیم ‘صرف میدان میں نہیں بلکہ صحافیوں کی رپورٹنگ سے جنم لیتے ہیں جو اپنی تحریر اور تصاویر کے ذریعے کھلاڑیوں کے حوصلے بلند کرتے ہیں۔
انہوں نے کہا کہ ارشد ندیم جیسے قومی ہیروز کی کامیابیاں ہوں یا پاکستان کی کرکٹ، ہاکی اور باکسنگ کی شاندار روایات، ان سب کو قوم کے سامنے لانے میں سپورٹس جرنلسٹس کا اہم کردار ہے۔انہوں نے کھیلوں کی کامیابی میں سپورٹس جرنلزم کے کردار کو تسلیم کرتے ہوئے کہا کہ ہمیں ان کی مسلسل حوصلہ افزائی کرنی چاہئے۔ انہوں نے کہا کہ سپورٹس جرنلزم صرف رپورٹنگ تک محدود نہیں، یہ انتظامی سطح پر بھی اپنا کردار ادا کر سکتی ہے، پی ٹی وی سپورٹس میں ایک سینئر سپورٹس جرنلسٹس کو سپورٹس ڈیپارٹمنٹ کا سربراہ بنایا گیا ہے۔
انہوں نے دیگر میڈیا اداروں پر بھی زور دیا کہ وہ بھی اس مثبت روایت کو اپنائیں۔ وفاقی وزیر نے کہا کہ حکومت جہاں کھیلوں کی سرپرستی اور حوصلہ افزائی کر رہی ہے وہاں سپورٹس جرنلزم کی حوصلہ افزائی بھی ہماری ترجیحات میں شامل ہے، حکومت پاکستان اور وزارت اطلاعات سپورٹس جرنلسٹس کو ہر ممکن معاونت یا سہولت فراہم کریں گی۔
انہوں نے کہا کہ ہم سب کو فخر ہے کہ ہم سبز ہلالی پرچم کے سائے میں ایسی قوم سے وابستہ ہیں جہاں بے پناہ ٹیلنٹ موجود ہے اور دنیا تک یہ پیغام پہنچانے میں آپ جیسے باخبر، مخلص اور محنتی صحافی ہی اصل سفیر ہیں۔
انہوں نے کہا کہ کھیلوں کے فروغ کیساتھ صحافت کی حوصلہ افزائی بھی کریں گے۔ وزیر اطلاعات نے سپورٹس جرنلسٹس ایسوسی ایشن کے نو منتخب عہدیداران کو مبارکباد دیتے ہوئے کہا امید ہے نومنتخب عہدیداران سپورٹس جرنلزم کے فروغ میں بھرپور کردار ادا کرتے رہیں گے۔
