تائی یوآن (شِنہوا) چین کے شمالی صوبہ شنشی نے رواں سال کے پہلے 5 ماہ میں مجموعی طور پر6.01 ارب مکعب میٹر کول بیڈ میتھین(سی بی ایم) پیدا کی ہے جو کہ ملک کی مجموعی سی بی ایم پیداوار کا تقریباً 82فی صد ہے۔
شنشی صوبائی ادارہ شماریات کے مطابق شنشی ٹیکنالوجی کی جدت کے ذریعے ملک گیر سی بی ایم صنعت میں تبدیلی کی قیادت کر رہا ہے۔
شنشی چین میں ایک بڑا کوئلہ پیدا کرنے والا صوبہ ہے ،حالیہ برسوں میں اس نے چین کے توانائی انقلاب پائلٹ پروگرام کے ایک حصے کے طور پر جامع اصلاحات کو فعال طور پر فروغ دیا ہے۔
صوبہ نے سی بی ایم کی اہم ٹیکنالوجیز میں مسلسل کامیابیاں حاصل کی ہیں جس سے 2 بڑے قومی سی بی ایم صنعتی مراکز اردوس طاس کے مشرقی کنارے اور چھن شوئی طاس کی ترقی کو مئوثر طریقے سے تیز کیا گیا ہے۔
عام طور پر گیس کے نام سے معروف سی بی ایم ایک غیر روایتی قدرتی گیس ہے جو بنیادی طور پر میتھین پر مشتمل ہوتی ہے اور کوئلے کی تہوں سے نکالی جاتی ہے۔
شنشی صوبہ سی بی ایم کے وسائل سے مالا مال ہے جہاں 2 ہزار میٹر سے کم گہرائی میں اندازاً 83.1 کھرب مکعب میٹر قابل حصول ذخائر موجود ہیں جو ملک کے مجموعی ذخائر کا تقریباً ایک تہائی بنتے ہیں۔
شنشی نے حالیہ برسوں میں کوئلے کی کان کنی سے پہلے گیس نکالنے کے ایک نئے ماڈل اور گیس اور کوئلے کے اخراج کو مربوط کرنے کا آغاز کیا ہے۔
اس نقطہ نظر نے نہ صرف سی بی ایم کی ترقی کے پیمانے میں نمایاں اضافہ کیا ہے بلکہ ایک بار ضائع ہونے والی گیس کو ایک قیمتی توانائی کے ذریعہ میں بھی تبدیل کر دیا ہے۔
برسوں کی تکنیکی محنت اور کامیابیوں کے بعد شنشی کی سی بی ایم صنعت نے ون-ٹرپ ڈرلنگ جیسی اہم ٹیکنالوجیز تیار کی ہیں جس سے ڈرلنگ، فریکچرنگ، نکاسی آب اور گیس جمع کرنے اور نقل و حمل پر محیط ایک مکمل صنعتی سلسلہ تشکیل پایا ہے۔
ان تکنیکی ترقیوں نے شنشی کے سی بی ایم شعبے میں انقلابی تبدیلیاں متعارف کروائی ہیں، اس سال 22 مئی کو شنشی کی داجی ڈیپ سی بی ایم فیلڈ میں یومیہ پیداوار 65 لاکھ مکعب میٹر سے تجاوز کر گئی جس نے ایک نیا ریکارڈ قائم کیا۔
اس فیلڈ میں 9 کنویں کے پلیٹ فارمز میں سے ہر ایک نے مجموعی طور پر 10 کروڑمکعب میٹر سے زیادہ پیداوار دی ہے جس میں سب سے زیادہ واحد کنویں کی پیداوار 7 کروڑ مکعب میٹر سے تجاوز کر گئی ہے۔
ماہرین کا کہنا ہے کہ شنشی کی سی بی ایم پیداوار 2007 میں صرف 1.9 ارب مکعب میٹر تھی لیکن 2024 میں یہ 13.43 ارب مکعب میٹر تک پہنچ گئی۔
یہ نمایاں ترقی شنشی کی سی بی ایم ترقیاتی ٹیکنالوجیز میں مسلسل کامیابیوں کو اجاگر کرتی ہے جو سی بی ایم صنعت کی ملک گیر ترقی کے لیے ایک ٹھوس بنیاد فراہم کرتی ہے۔
