چین نے ’’دنیا کی چھت‘‘ کے سبزہ زاروں کا نیا نباتاتی نقشہ جاری کردیا

بیجنگ(شِنہوا)چین نے چھنگ ہائی-شی زانگ سطح مرتفع پر گھاس کے میدانوں کی نباتات کا اب تک کا سب سے تفصیلی نقشہ جاری کر دیا ہے جو 1:500,000 کے پیمانے پر تیار کیا گیا ہے۔

یہ نقشہ یونیورسٹی آف چائنیز اکیڈمی آف سائنسز (یو  سی اے ایس)  کے پروفیسر وانگ یان فین کی سربراہی میں ایک ٹیم نے تیار کیا ہے اور یہ گھاس کے میدانوں کی نباتات کی نقشہ سازی سے متعلق ایک تعلیمی سیمینار کے دوران باضابطہ طور پر پیش کیا گیا۔

سیمینار میں ماہرین نے بتایا کہ یہ نقشہ جو زمینی سروے اور متعدد ذرائع سے حاصل کردہ ریموٹ سینسنگ ڈیٹا پر مبنی ہے۔ پودوں کی تشکیل کی تقسیم کو درست طریقے سے ظاہر کرتا ہے اور موسمی موافقت، پائیدار ترقی اور سطح مرتفع پر ماحولیاتی نظام کے افعال پر مستقبل کی تحقیق کے لئے اہم اثرات رکھتا ہے۔

چھنگ ہائی-شی زانگ سطح مرتفع جسے دنیا کی چھت اور ایشیا کا آبی مینار بھی کہا جاتا ہے، چین کے لئے ایک اہم حیاتیاتی حفاظتی ڈھال کا کام کرتا ہے۔ اس کا حیاتیاتی نظام بنیادی طور پر گھاس کے میدانوں پر مشتمل ہے جو حیاتیاتی طور پر نازک ہیں اور عالمی موسمی تبدیلی کے لئے انتہائی حساس ہیں۔

گزشتہ 50 برسوں میں شدید موسمی تبدیلی اور انسانی سرگرمیوں میں اضافے نے نباتات کی تقسیم کے نمونوں کو تبدیل کر دیا ہے جس کے نتیجے میں موجودہ نقشے پرانے ہوگئے تھے۔

2017 میں سطح مرتفع پر دوسری سائنسی مہم کا آغاز گھاس کے میدانوں کی نباتات کے نقشے کو اپ ڈیٹ کرنے کا ایک نیا موقع فراہم کر گیا۔