راولپنڈی: فیلڈ مارشل عاصم منیر نے ملک کو درپیش چیلنجز کا مل کر مقابلہ کرنے کیلئے اوورسیز پاکستانی کمیونٹی سے روابط کے تسلسل ،باہمی تعاون کو مزید فروغ دینے کی ضرورت پر زور دیتے ہوئے کہا ہے کہ بیرون ملک مقیم پاکستانی ترسیلات زر، سرمایہ کاری ،مختلف شعبوں میں نمایاں کامیابیوں سے وطن کی معیشت ،عالمی ساکھ بہتر بنانے میں اہم کردار ادا کر رہے ہیں۔
آئی ایس پی آر کی جانب سے جاری بیان کے مطابق چیف آف آرمی سٹاف فیلڈ مارشل سید عاصم منیر سرکاری دورے پر امریکہ میں موجود ہیں۔فیلڈ مارشل نے واشنگٹن ڈی سی میں مقیم اوورسیز پاکستانی کمیونٹی سے ملاقات کی جہاں انہیں بھرپور پذیرائی ملی، بڑی تعداد میں پاکستانی کمیونٹی نے آرمی چیف سے ملاقات کیلئے شرکت کی۔
بیان کے مطابق پاک فوج کے سربراہ نے امریکہ میں مقیم پاکستانیوں سے خطاب کیا اور اوورسیز کمیونٹی کی خدمات کو سراہا ۔اوورسیز پاکستانیوں نے حالیہ آپریشن بنیانِ مرصوص /معرکہ حق میں پاک فوج کی بہادری اور پیشہ ورانہ کارکردگی کو زبردست خراج تحسین پیش کیا۔آئی ایس پی آر کے مطابق فیلڈ مارشل سید عاصم منیر نے اپنے خطاب میں بیرون ملک مقیم پاکستانیوں کو پاکستان کا اصل سفیر قرار دیتے ہوئے کہا کہ پاکستانی ترسیلات زر، سرمایہ کاری اور مختلف شعبہ جات میں نمایاں کامیابیوں کے ذریعے وطن کی معیشت اور عالمی ساکھ کو بہتر بنانے میں اہم کردار ادا کر رہے ہیں۔
ملاقات میں اوورسیز پاکستانیوں نے اپنے خیالات، تجربات اور تجاویز کا تبادلہ کیا جسے سپہ سالار نے نہایت سنجیدگی سے سنا۔بیان کے مطابق فیلڈ مارشل نے اوورسیز کمیونٹی سے روابط کے تسلسل اور باہمی تعاون کو مزید فروغ دینے کی ضرورت پر زور دیا تاکہ درپیش چیلنجز کا مل کر مقابلہ کیا جا سکے۔
آئی ایس پی آر کے مطابق ملاقات نئے عزم اور جذبے کیساتھ اختتام پذیر ہوئی، فیلڈ مارشل اور اوورسیز پاکستانیوں نے محفوظ، خوشحال اور مضبوط پاکستان کیلئے مل کر کام کرنے کے عزم کا اعادہ کیا۔
