استنبول(شِنہوا) یوکرینی اور روسی وفود کے درمیان استنبول میں ہونے والے تازہ امن مذاکرات میں متوازن مگر ٹھوس پیش رفت ہوئی جس سے انسانی ہمدردی پر مبنی اقدامات میں وسعت کے ذریعے دشمنی میں ممکنہ کمی کی امید پیدا ہوئی ہے۔ ان اقدامات میں تنازع کے آغاز کے بعد سے اب تک قیدیوں کے سب سے بڑے تبادلے پر اتفاق بھی شامل ہے۔
تقریباً 90 منٹ جاری رہنے والا یہ اجلاس حالیہ ہفتوں میں فریقین کے درمیان براہ راست بات چیت کا دوسرا دور تھا۔ ترک حکام نے اس نتیجے کو "محتاط امید” کے طور پر بیان کیا۔
ترکیہ کی وزارت خارجہ کے ترجمان اونکو کیسیلی نے کہا کہ مذاکرات کا اختتام منفی نہیں تھا۔ انہوں نے اس بات چیت کے لہجے کو تعمیری قرار دیا، اگرچہ بڑے تنازع پر اب بھی اختلافات برقرار ہیں۔
ان مذاکرات کی قیادت کرنے والے ترک وزیر خارجہ ہکان فیدان نے سوشل میڈیا پلیٹ فارم ایکس پر کہا کہ وفود نے پہلے سے طے شدہ نکات پر پیش رفت کی جن میں انسانی تبادلوں سے متعلق اقدامات شامل ہیں۔
کیف کے وفد کی قیادت کرنے والے یوکرین کے وزیر دفاع رستم عمروف نے 30 روزہ غیر مشروط جنگ بندی، جبری طور پر بے دخل کئے گئے بچوں اور کم عمر فوجیوں کی واپسی اور قیدیوں کی رہائی کی تجویز دی۔ انہوں نے جنگ کے خاتمے کے لئے "حقیقی کوششوں” کا مطالبہ کیا اور رہنماؤں کے ممکنہ سربراہ اجلاس کی وسیع کوشش کے طور پر 20 سے 30 جون کے درمیان مذاکرات کے تیسرے دور کی تجویز دی۔
روسی وفد کی قیادت کرنے والے صدارتی مشیر ولادیمیر میڈنسکی نے معاہدے کی تصدیق کی جسے انہوں نے جنگ کے آغاز سے اب تک کا سب سے بڑا قیدیوں کا تبادلہ قرار دیا۔ انہوں نے کہا کہ تمام شدید زخمی اور بیمار فوجیوں کے ساتھ ساتھ 25 سال سے کم عمر کے تمام گرفتار فوجیوں کا تبادلہ کیا جائے گا۔
میڈنسکی نے مزید کہا کہ ماسکو 6 ہزار یوکرینی فوجیوں کی لاشیں واپس کرے گا اور ان کی بازیابی کے لئے مخصوص سرحدی علاقوں میں 2 سے 3 دن کی جنگ بندی کی تجویز بھی پیش کی۔ انہوں نے اس بات کی تصدیق کی کہ جبری طور پر بے دخل کئے گئے یوکرینی بچوں کی واپسی پر بات چیت جاری ہے اور کیف نے 339 بچوں کی فہرست جمع کرائی ہے۔ ہم اس پر کام کریں گے۔
