نیو یارک: اقوام متحدہ میں پاکستان کے مستقل مندوب عاصم افتخار احمد نے کہا ہے کہ سندھ طاس معاہدے کی یکطرفہ معطلی سمیت دیگر جارحانہ بھارتی اقدامات اقوام متحدہ چارٹر کی خلاف ورزی ہیں، مسئلہ کشمیر حل کئے بغیر خطے میں دیرپا امن ممکن نہیں۔
ذرائع کے مطابق عرب گروپ کے سفیروں کو جنوبی ایشیاء کی موجودہ علاقائی صورت حال پر بریفنگ دیتے ہوئے عاصم افتخار احمد نے بتایا کہ سندھ طاس معاہدے کی یکطرفہ معطلی سمیت دیگر جارحانہ بھارتی اقدامات اشتعال انگیز، بین الاقوامی قوانین اور اقوام متحدہ کے چارٹر کی سنگین خلاف ورزی ہیں۔
انہوں نے کہا کہ بھارتی جارحیت پر پاکستان کا ردعمل عالمی چارٹر کے تحت اپنے دفاع کے حق کے استعمال میں متناسب اقدام تھا۔
جموں و کشمیر تنازع کو اقوام متحدہ کی سلامتی کونسل کی قراردادوں اور کشمیریوں کی امنگوں کے مطابق حل کئے بغیر جنوبی ایشیا میں پائیدار امن قائم نہیں ہوسکتا۔انہوں نے جنگ بندی برقرار رکھنے ،کشیدگی میں کمی کیلئے تمام ضروری اقدامات کے پاکستانی عزم کا اظہار کیا۔
