کانز: ہالی ووڈ کے سپر اسٹار ٹام کروز نے اپنے پسندیدہ کردار ایتھن ہنٹ کو جذباتی انداز میں الوداع کہہ دیا ۔ کانز فلم فیسٹیول 2025 کے دوسرے دن فلم مشن امپاسیبل فائنل ریکننگ گرینڈ تھیئٹر لومیئر میں نمائش کیلئے پیش کی گئی۔
یہ فلم نا صرف مشن امپاسیبل سیریز کی آٹھویں اور آخری قسط ہے، بلکہ یہ بڑے پردے پر ایتھن ہنٹ کے طور پر ٹام کروز کی آخری فلم بھی ہے۔ 62 سالہ آسکر نامزد اداکار اپنی آنکھوں میں آنسو لیے مائیک پر آئے اور ناظرین سے خطاب کرتے ہوئے کہا کہ میں گزشتہ 30 سالوں سے اس سیریز کے ذریعے لوگوں کو تفریح فراہم کرنے پر بیحد شکر گزار ہوں، یہی ردعمل ہے جو ہمیں کام کرنے پر مجبور کرتا ہے۔
آپ ہی ہماری اصل وجہ ہیں، یہ اسکرین تجربہ ہی ہمیں زندہ رکھتا ہے۔نمائش کے بعد حاضرین نے لیجنڈری اداکار کیلئے کئی منٹ تک کھڑے ہو کر تالیاں بجائیں، داد دی اور محبت سے خراج تحسین پیش کیا، یہ لمحہ ٹام کروز کو اشکبار کر گیا۔
واضح رہے کہ مشن امپاسیبل دی فائنل ریکننگ ایک ایسی فرنچائز کا اختتام ہے جو 1996 میں شروع ہوئی تھی۔ ٹام کروز نے ناصرف مرکزی کردار ادا کیا، بلکہ پہلی بار اس سیریز میں بطور پروڈیوسر بھی اپنی صلاحیتوں کا لوہا منوایا۔
