کالا شاہ کاکو: وزیراعلی پنجاب مریم نواز نے کہا ہے کہ نفرت کی سیاست نے ملک کو کچھ نہیں دیا، ملک کی خاطر ذاتی انا قربان کرنا ہوگی،پاکستان کی معیشت معجزہ بن گئی ہے، مہنگائی، لوڈشیڈنگ کا خاتمہ ،بجلی قیمتوں میں کمی ہوئی، پاکستان کا امن ہماری ریڈ لائن ہے،بھارتی جارحیت کیخلاف سیاسی و عسکری قیادت سب نے مل کر ملک کا دفاع کیا۔
کالا شاہ کاکو میں گندم انیشیٹو پروگرام کے تحت ٹریکٹرز تقسیم کرنے کی تقریب سے خطاب کرتے ہوئے وزیراعلی مریم نواز نے کہا کہ سب کو پاکستان کی فتح مبارک ہو، قوم پر فخر ہے جس نے سیسہ پلائی دیوار کی طرح ملکی سلامتی میں حصہ ڈالااور پاک فوج کی بھرپور حمایت کی۔ انہوں نے کہا کہ پاک افواج زندہ باد تو پاکستان زندہ باد ہے۔
مریم نواز نے کہا کہ پاک افواج نے بنیان مرصوص کے تحت بھارت کو شکست سے دوچار کیا، یہ جنگ صرف سرحدوں کی نہیں نظریات اور جذبے کی جنگ تھی، پاکستان کا امن ہماری ریڈ لائن ہے، تمام سیاسی قیادت کیلئے پاکستان ریڈ لائن ہونی چاہئے، نفرت کی سیاست نے اس ملک کو کچھ نہیں دیا، ہمیں ملک کی خاطر ذاتی انا قربان کرنا ہوگی، نفرت کی سیاست کے خاتمے سے ملک ترقی کرے گا۔
انہوں نے کہا کہ ملک ہے تو خوشحالی ہے، اللہ پاکستان کو تاقیامت سلامت رکھے، وزیراعظم اور آرمی چیف کو عظیم فتح پر خراج تحسین پیش کرتی ہوں، سیاسی قیادت ہو یا عسکری قیادت سب نے ایک ہو کر ملک کا دفاع کیا۔ انہوں نے کہا کہ پاکستان کی معیشت میں حیران کن استحکام دیکھنے میں آیا، مہنگائی میں کمی سے بازاروں میں اشیائے خورونوش سستے داموں مل رہی ہیں، لوڈشیڈنگ کا خاتمہ اور بجلی قیمتوں میں کمی ہوئی، سٹاک ایکسچینج میں زبردست تیزی دیکھنے میں آئی ہے۔
انہوں نے کہا کہ دنیا کے بڑے اخبار آج لکھ رہے ہیں کہ پاکستان کی معیشت ایک معجزہ بن گئی ہے، ایک ہزار کسانوں کو مبارکباد جنہوں نے تاریخی گندم اگائی، آج انہیں مفت ٹریکٹر مل رہا ہے۔ انہوں نے کہا کہ زرعی شعبے کی ترقی پنجاب حکومت کی ہمیشہ سے ترجیح رہی، کسان خوشحال تو پاکستان خوشحال ہوگا۔
وزیراعلی نے کہا کہ کسانوں کو سستی کھاد، بیج اور سپرسیڈر پر سبسڈی دی گئی کسان کو زرعی سہولیات کی فراہمی یقینی بنائی جا رہی ہیں۔ انہوں نے کہا کہ کسان کارڈ کے ذریعے کسانوں کو فی ایکڑ 5ہزار روپے دیئے جائیں گے ۔
اس موقع پر وزیراعلی نے کسانوں کو 10کے وی سولر سسٹم پر 95فیصد جبکہ 15کے وی سولر سسٹم پر 90فیصد سبسڈی دینے کا اعلان کرتے ہوئے کہا کہ زرعی مالز تکمیل کے آخری مراحل میں ہیں، جہاں تمام سہولیات فراہم کریں گے۔قبل ازیں وزیراعلی نے گندم سپورٹ پروگرام کے تحت گرین ٹریکٹر تقسیم کئے، پہلے مرحلے میں 9500گرین ٹریکٹر کاشتکاروں کو بذریعہ شفاف قرعہ اندازی فراہم کئے گئے جبکہ دوسرے مرحلے میں 25ہزار مزید گرین ٹریکٹرز سبسڈی پر فراہم کئے جائینگے۔
